പത്തനംതിട്ട: ഇളമണ്ണൂരില്‍ കാപ്പ കേസ് പ്രതി ജെറില്‍ പി. ജോര്‍ജ്ജിനെ കൊലപ്പെടുത്താന്‍ ശ്രമിച്ച കേസില്‍ മൂന്ന് പേരെ പൊലീസ് പിടികൂടി. കാപ്പ കേസ് പ്രതികളായ ഏഴംകുളം സ്വദേശി വിഷ്ണു വിജയന്, അങ്ങാടിക്കല്‍ വടക്ക് സ്വദേശി കാര്‍ത്തിക്, വയല സ്വദേശി ശ്യാം എന്നിവരാണ് അറസ്റ്റിലായത്.
സാമ്പത്തിക തര്‍ക്കത്തെ തുടര്‍ന്ന് ജനുവരി 18 നാണ് കണ്ണൂര്‍ സ്വദേശി ജെറിലിന് ക്രൂരമര്‍ദ്ദനമേറ്റത്. വിഷ്ണു വിജയന് ജെറില്‍ നല്‍കിയ പണം മടക്കി ചോദിച്ചതിലെ വൈരാഗ്യത്തില്‍ പത്തനംതിട്ട ഇളമണ്ണൂരിലുള്ള വീട്ടിലെത്തിച്ചായിരുന്നു മര്‍ദ്ദനം.
ജെറിലിന്റെ പുറത്തും നെഞ്ചിലും ബ്ലേഡ് കൊണ്ട് മുറിവേല്‍പ്പിച്ച ശേഷം എയര്‍ ഗണ്‍ ഉപയോഗിച്ച് ചെവിയില്‍ അടിക്കുകയും ചെയ്തു. രഹസ്യഭാഗത്തും തുടയിലും തീക്കനല്‍ വാരിയിട്ട് പൊള്ളലേല്‍പ്പിച്ചുവെന്ന് ജെറില്‍ പറയുന്നു.
പരിക്കേറ്റ ജെറിലിനെ ആശുപത്രിയിലെത്തിക്കാതെ അഞ്ച് ദിവസം മുറിയില്‍ പൂട്ടിയിട്ടു. തുടര്‍ന്ന് വീട്ടില്‍ നിന്ന് രക്ഷപ്പെട്ട് ജെറില്‍ ആശുപത്രിയില്‍ ചികിത്സ തേടി. കാപ്പ കേസ് പ്രതികളായ സൂര്യലാല്‍, ചന്ദ്രലാല്‍ എന്നിവരുടെ വീട്ടില്‍ വെച്ചാണ് കുറ്റകൃത്യം നടന്നത്. മയക്കുമരുന്നുമായി ബന്ധപ്പെട്ട സാമ്പത്തിക ഇടപാടിലെ തര്‍ക്കമാണ് മര്‍ദ്ദനത്തിന് പിന്നിലെന്നാണ് പൊലീസ് പറയുന്നത്.
