ഹോം ഗ്രൗണ്ടില്‍ തോറ്റ് ആസ്റ്റണ്‍ വില്ല

ബിര്‍മിങ്ഹാം: പ്രീമിയര്‍ ലീഗ് ഫുട്‌ബോളില്‍ സീസണില്‍ വമ്പന്‍ കുതിപ്പ് നടത്തിയ ആസ്റ്റണ്‍ വില്ലയ്‌ക്ക് കനത്ത തോല്‍വി. സ്വന്തം തട്ടകത്തില്‍ ആര്‍സനല്‍, ലിവര്‍പൂള്‍ തുടങ്ങിയ വമ്പന്‍മാരെ അട്ടിമറിച്ച അവര്‍ കഴിഞ്ഞ മത്സരത്തില്‍ ന്യൂക്കാസിലിനോട് പരാജയപ്പെട്ടു. ന്യൂകാസില്‍ യുണൈറ്റഡിന്റെ മൂന്നിനെതിരെ ഒരു ഗോള്‍ നേടാനേ ആസ്റ്റണ്‍ വില്ലയ്‌ക്ക് സാധിച്ചുള്ളൂ.

സ്വിറ്റ്‌സര്‍ലന്‍ഡില്‍ നിന്നുള്ള പ്രതിരോധതാരം ഫാബിയന്‍ സ്‌കാര്‍ നേടിയ ഇരട്ട ഗോളിന്റെ ബലത്തിലാണ് ന്യൂകാസില്‍ വിജയം പിടിച്ചത്. മത്സരത്തിന്റെ ആദ്യപകുതിയില്‍ 32, 36 മിനിറ്റുകളിലായിരുന്നു ഫാബിയാന്റെ ഗോളുകള്‍. രണ്ടാം പകുതിയിലേക്ക് നീങ്ങിയ കളിയില്‍ ആസ്റ്റണിനെ പൂജ്യത്തില്‍ നിര്‍ത്തി ന്യൂകാസില്‍ മൂന്നാം ഗോളും നേടി. 52-ാം മിനിറ്റില്‍ ദാനഗോളിലൂടെയാണ് സ്‌കോര്‍ വര്‍ദ്ധിപ്പിച്ചത്. ആസ്റ്റണ്‍ വില്ലയ്‌ക്കായി 71-ാം മിനിറ്റില്‍ ഓലീ വാറ്റ്കിന്‍സ് ആശ്വാസ ഗോള്‍ മടക്കി.

പ്രീമിയര്‍ ലീഗില്‍ ഇന്നലെ നടന്ന വമ്പന്‍മാരുടെ പോരാട്ടത്തില്‍ ലിവര്‍പൂള്‍ ചെല്‍സിയെ തകര്‍ത്തു. ഒന്നിനെതിരെ നാല് ഗോളുകള്‍ക്കായിരുന്നു ലിവറിന്റെ വിജയം. രണ്ട് പകുതികൡലും ലിവര്‍ രണ്ട് ഗോള്‍ വീതം നേടി. ലിവര്‍ താരം ഡിയോഗോ ജോട്ടയാണ് 23-ാം മിനിറ്റില്‍ കളിയിലെ ആദ്യ ഗോള്‍ നേടിയത്. 39-ാം മിനിറ്റില്‍ കൊണോര്‍ ബ്രാഡ്‌ലിയിലൂടെ ടീം ഗോള്‍ നേട്ടം ഇരട്ടിപ്പിച്ചു. 65-ാം മിനിറ്റില്‍ ഡോമിനിക് സോബോസ്‌ലായി ഗോള്‍ നേട്ടം 3-0 ആക്കി ഉയര്‍ത്തി. ഇതിന് ശേഷമാണ് ചെല്‍സി മദ്ധ്യനിര താരം ക്രിസ്റ്റഫര്‍ എന്‍കുങ്കുവിലൂടെ ഒരു ഗോള്‍ തിരിച്ചടിച്ചത്. എട്ട് മിനിറ്റിനകം ലൂയിസ് ഡയസ് നേടിയ ഗോളോടെ ലിവര്‍ ക്വാട്ട പൂര്‍ത്തിയാക്കി.

ബണ്‍ലിക്കെതിരെ മാഞ്ചസ്റ്റര്‍ സിറ്റി ഇന്നലെ തകര്‍പ്പന്‍ വിജയം സ്വന്തമാക്കി. ജയത്തെ തുടര്‍ന്ന് ആഴ്‌സനലിനെ മറികടന്ന് സിറ്റി രണ്ടാം സ്ഥാനത്തേക്കുയര്‍ന്നു. 46 പോയിന്റ് വീതമുള്ള സിറ്റി, ആഴ്‌സനല്‍ ടീമുകളെക്കാള്‍ അഞ്ച് പോയിന്റ് മുന്നിലാണ് ലിവര്‍പൂള്‍. അര്‍ജന്റീന മുന്‍നിരതാരം ഹൂലിയന്‍ അല്‍വാരസ് നേടിയ ഇരട്ടഗോളിലാണ് സിറ്റി ബണ്‍ലിക്കെതിരെ തകര്‍പ്പന്‍ ജയം നേടിയത്. മറ്റൊരു ഗോള്‍ റോഡ്രിയുടെ വകയായിരുന്നു. ബണ്‍ലിക്കായി ആശ്വാസ ഗോള്‍ കളിയുടെ അവസാന മിനിറ്റുകളില്‍ അമീന്‍ അല്‍ ദാഖില്‍ കണ്ടെത്തി.

ഇന്നലെ നടന്ന മറ്റൊരു പ്രീമിയര്‍ ലീഗ് പോരാട്ടത്തില്‍ ടോട്ടനം ഹോട്‌സ്പര്‍ ബ്രെന്റ്‌ഫോര്‍ഡിനെ കീഴടക്കി. 3-2നായിരുന്നു ടോട്ടനത്തിന്റെ വിജയം. 56-ാം മിനിറ്റില്‍ ബ്രസീല്‍ താരം റിച്ചാര്‍ലിസണ്‍ ആണ് ടോട്ടനം വിജയം ഉറപ്പാക്കിയ മൂന്നാം ഗോള്‍ നേടിയത്. 43 പോയിന്റുമായി ആഴ്‌സനലിന് പിന്നില്‍ നാലാം സ്ഥാനത്തേക്ക് ഉയര്‍ന്നിരിക്കുകയാണ് ടോട്ടനം.