വിശാഖപട്ടണം: ആദ്യ ടെസ്റ്റില് ഞെട്ടിക്കുന്ന തോല്വിയേറ്റുവാങ്ങിയ ഭാരത ക്രിക്കറ്റ് ടീം ഇന്ന് പരമ്പരയിലെ രണ്ടാം മത്സരത്തിന്. ഇംഗ്ലണ്ടിനെതിരായ അഞ്ച് ടെസ്റ്റുകളടങ്ങിയ പരമ്പരയില് ഭാരതം 1-0ന് പിന്നിലാണ്. ഇന്ന് ആരംഭിക്കുന്ന രണ്ടാം മത്സരം എന്ത് വിലകൊടുത്തും വിജയിച്ച് അഭിമാനം തിരിച്ചുപിടിക്കാനാണ് രോഹിത് ശര്മയും സംഘവും ഇറങ്ങുക.
സൂപ്പര് താരം വിരാട് കോഹ്ലിയുടെ പിന്മാറ്റത്തിനൊപ്പം രണ്ട് വിലപ്പെട്ട താരങ്ങളെ നഷ്ടപ്പെട്ട സാഹചര്യത്തില് കൂടിയാണ് ഭാരതം രണ്ടാം ടെസ്റ്റിനിറങ്ങുന്നത്. ബാറ്റിങ് ഓര്ഡറില് മദ്ധ്യനിരയില് നഷ്ടപ്പെട്ട കെ.എല്. രാഹുലിന് പകരം ഉള്പ്പെടുത്തിയിരിക്കുന്നത് രജത്ത് പാട്ടിദാറിനെയാണ്. പക്ഷെ ഓള് റൗണ്ടര് രവീന്ദ്ര ജഡേജയ്ക്ക് പകരം മറ്റൊരു താരത്തെ കണ്ടെത്താന് സാധിച്ചില്ല. സ്പിന്നര് എന്ന നിലയ്ക്ക് കുല്ദീപ് യാദവിനെ പ്ലേയിങ് ഇലവനില് ഉള്ക്കൊള്ളിച്ചിട്ടുണ്ട്. കഴിഞ്ഞ ടെസ്റ്റിന്റെ ആദ്യ ഇന്നിങ്സില് ജഡേജ ബാറ്റിങ്ങില് കാട്ടിയ മികവാണ് മത്സരത്തിന് പോരാട്ടവീര്യം സമ്മാനിച്ചത്. താരത്തിന്റെ പിന്മാറ്റത്തിന് ഭാരത ക്യാമ്പിന് പകരംവയ്ക്കാനായില്ലെന്ന വാസ്തവം ഉള്ക്കൊണ്ട് കൂടിയാണ് രോഹിത്തിന് കീഴിലുള്ള ഭാരത ടീം ഇന്നിറങ്ങുക.
മറുവശത്ത് ഇംഗ്ലണ്ട് കുറച്ചുകൂടി കൂടുതല് കരുത്തരായിരിക്കുകയാണ്. ജാക്ക് ലീച്ച് പരിക്കേറ്റ് പുറത്തായെങ്കിലും പകരം മറ്റൊരു ബൗളറെ കണ്ടെത്തിയിട്ടുണ്ട്. ഇതിനൊപ്പം പരിചയ സമ്പന്നനായ ആന്ഡേഴ്സണ് ടീമിലേക്കെത്തുകയാണ്. ഇത്രത്തോളമെത്തുമ്പോള് സമൃദ്ധമായ ടീം ആകും ഇംഗ്ലണ്ട്.
ഭാരത ബാറ്റര്മാര് കൂടുതല് അച്ചടക്കത്തോടെ ബാറ്റ് ചെയ്യേണ്ടതുണ്ടെന്ന് ഇന്നലെ ഭാരതത്തിന്റെ ബാറ്റിങ് പരിശീലകന് വിക്രം റാത്തോഡ് പ്രതികരിച്ചു. പിടിച്ചു നിന്ന് കളിക്കുന്നതിന് പകരം എങ്ങനെ വേഗം പുറത്താകാം എന്ന് ഭാരത ബാറ്റര്മാര് മത്സരിക്കുകയാണെന്ന് റാത്തോഡ് പറഞ്ഞു.
പുതിയ വീര്യത്തില് ഭാരതത്തിന് ആദ്യ കളിയിലേറ്റ മങ്ങല് മായ്ച്ചുകളയുന്നതും കാത്താണ് വിസാഗ് ടെസ്റ്റിലേക്ക് ക്രിക്കറ്റ് ആരാധകരെല്ലാം കാത്തിരിക്കുന്നത്.
ഭാരതം സാധ്യതാ ഇലവന്: രോഹിത് ശര്മ(ക്യാപ്റ്റന്), യശസ്വി ജയ്സ്വാള്, ശുഭ്മാന് ഗില്, ശ്രേയസ് അയ്യര്, രജത് പാട്ടിദാര്, അക്ഷര് പട്ടേല്, കെ.എസ്. ഭാരത്(വിക്കറ്റ് കീപ്പര്), ആര്. അശ്വിന്, കുല്ദീപ് യാദവ്, ജസ്പ്രീത് ബുംറ, മുഹമ്മദ് സിറാജ്
