മലപ്പുറം :നിലമ്പൂരില് യുവാവ് തൂങ്ങിമരിച്ച സംഭവത്തില് പൊലീസിനെതിരെ ആരോപണം.സാമൂഹ്യമാധ്യമത്തില് പൊലീസിനെതിരെ ആരോപണങ്ങളടങ്ങുന്ന വീഡിയോ പോസ്റ്റ് ചെയ്ത ശേഷമാണ് നിലമ്പൂര് സ്വദേശി മുഹമ്മദ് ജാസിത് ജീവനൊടുക്കിയത്.
പ്രണയ വിഷയത്തില് പൊലീസ് നിരന്തരം സ്റ്റേഷനിലേക്ക് വിളിച്ചുവരുത്തിയെന്ന് മുഹമ്മദ് ജാസിത് ആരോപിച്ചു. തനിക്ക് പറയാനുള്ളത് പോലും കേള്ക്കാന് തയാറായില്ലെന്നും യുവാവ് വീഡിയോയില് പറയുന്നുണ്ട്.
പൊലീസിനെതിരെ യുവാവിന്റെ കുടുംബവും രംഗത്തെത്തിയിട്ടുണ്ട്. ഞായറാഴ്ച പുലര്ച്ചെയാണ് മുഹമ്മദ് ജാസിതിനെ വീടിന്റെ ടെറസിന് മുകളില് മരിച്ച നിലയില് കണ്ടെത്തിയത്. താന് ജീവിച്ചിരിക്കുമെന്ന് ഉറപ്പില്ല. മരിച്ചാല് നിലമ്പൂര് പൊലീസും യുവതിയുടെ അമ്മയും ആയിരിക്കും ഉത്തരവാദികളെന്നും വിഡിയോയില് ആരോപിക്കുന്നു. തന്റെ ഫോണിലെ ചില രേഖകള് പൊലീസ് നശിപ്പിച്ചെന്നും യുവാവ് പറയുന്നുണ്ട്.
