ഇന്ത്യന് ടെന്നീസിലെ മുന് സൂപ്പര് താരമായ സാനിയാ മിര്സയുടെ ഭര്ത്താവും പാകിസ്താന്റെ മുന് ഓള്റൗണ്ടറുമായ ഷുഐബ് മാലിക്ക് വീണ്ടും വിവാഹിതനായി.
പ്രമുഖ പാകിസ്താനി നടിയായ സനാ ജാവേദിനെയാണ് മാലിക്ക് ജീവിത സഖിയാക്കിയിരിക്കുന്നത്. ദൈവത്തിനു സ്തുതി, ഞങ്ങള് നിങ്ങളെ ജോടികളായി സൃഷ്ടിച്ചുവെന്നായിരുന്നു സനയെ ചേര്ത്തു നിര്ത്തിയുള്ള ഫോട്ടോസിനൊപ്പം മാലിക്ക് ഇന്സ്റ്റഗ്രാമില് കുറിച്ചത്.
മാലിക്കും സനയും തമ്മിലുള്ള പ്രണയത്തെക്കുറിച്ചു നേരത്തേ തന്നെ പല റിപ്പോര്ട്ടുകളും വന്നിരുന്നു. പക്ഷെ അന്നു ഇരുവരും ഇവയെല്ലാം നിഷേധിക്കുകയും ചെയ്തിരുന്നു. എന്നാല് ഈ അഭ്യൂഹങ്ങളെല്ലാം ശരി വച്ചുകൊണ്ടാണ് മാലിക്കും സനയും ഔദ്യോഗികമായി ഇപ്പോള് ഒന്നിച്ചിരിക്കുന്നത്.
ഇതിനുപിന്നാലെ, സാനിയ ഭര്ത്താവില് നിന്ന് വിവാഹമോചിതയാകാനുള്ള ഖുല്അ് ചെയ്തതായി പിതാവ് ഇമ്രാന് മിര്സ അറിയിച്ചു. വിവാഹവും വിവാഹമോചനവും കഠിനമാണ്, നിങ്ങളുടേത് തിരഞ്ഞെടുക്കുക…എന്നു തുടങ്ങുന്ന കുറിപ്പ് സാനിയ ഇന്സ്റ്റാ ഗ്രാമില് പോസ്റ്റ് ചെയ്തിരുന്നു. 2010ലായിരുന്നു സാനിയ- മാലിക് വിവാഹം. 2018ല് മകന് ജനിച്ചു. ദുബായിലായിരുന്നു താമസം.
ഉര്ദു ടെലിവിഷനില് ആരാധര്ക്കു ഏറെ പ്രിയങ്കരിയായ നടിമാരില് ഒരാളാണ് സനാ ജാവേദ്. മോഡലിങിലൂടെയാണ് അവരുടെ തുടക്കം. മോഡലിങില് ശ്രദ്ധിക്കപ്പെട്ടതോടെ സനയ്ക്കു പല ടെലിവിഷന് പരസ്യങ്ങളിലും അവസരങ്ങള് ലഭിക്കുകയും ചെയ്തു. തുടര്ന്നായിരുന്നു ടെലിവിഷന് സീരിയലുകളിലൂടെ അഭിനയ രംഗത്തേക്കുള്ള വരവ്. 2012ല് ഇറങ്ങിയ മേരാ പെഹലാ പ്യാര് എന്ന പരമ്പരയില് സപ്പോര്ട്ടിങ് റോളിലൂടെയായിരുന്നു സനയുടെ അഭിനയത്തിലെ അരങ്ങേറ്റം.
