പീരുമേട്: കൊട്ടരക്കര-ദിണ്ടിക്കല്‍ ദേശീയപാതയില്‍ കരടിക്കുഴി 56-ാം മൈല്‍ അയ്യപ്പ കോളേജിന് സമീപം കെഎസ്ആര്‍ടിസി ബസ് റോഡില്‍ നിന്ന് തെന്നിമാറി അപകടം.
സംരക്ഷണ ഭിത്തിയിലെ വലിയ തിട്ടക്ക് മുകളില്‍ വാഹനത്തിന്റെ മധ്യഭാഗം തട്ടി നിന്നതിനാല്‍ ഒഴിവായത് വലിയ ദുരന്തം. കുമളിയില്‍ നിന്ന് കൊല്ലത്തേക്ക് പോവുകയായിരുന്ന ബസ് ആണ് ഇന്നലെ പുലര്‍ച്ചെ അഞ്ചിന് അപകടത്തില്‍പ്പെട്ടത്.
ബസ് ഇവിടെ നിന്നില്ലായിരുന്നെങ്കില്‍ 25 അടിയോളം താഴ്ചയിലേക്ക് വീഴുമായിരുന്നു. താഴെ സ്വകാര്യ കോളജിന്റെ ഹോസ്റ്റല്‍ സ്ഥിതി ചെയ്യുന്നുണ്ട്. ഇതിന്റെ മതിലിലാണ് ബസ് തങ്ങിനിന്നത്. ഹോസ്റ്റലില്‍ വിദ്യാര്‍ത്ഥികള്‍ ഉണ്ടായിരുന്നു. ബസില്‍ 7 യാത്രക്കാരാണ് ഉണ്ടായിരുന്നത്. അപകടത്തില്‍ ആര്‍ക്കും പരിക്കില്ല. ബസ് സംരക്ഷണ ഭിത്തിയില്‍ തൂങ്ങിയാടിയതോടെ യാത്രക്കാര്‍ വേഗത്തില്‍ പുറത്തേക്ക് ചാടി രക്ഷപ്പെടുകയായിരുന്നു. പീരുമേട് അഗ്‌നിരക്ഷാസേന, പോലീസ്, മോട്ടോര്‍ വെഹിക്കിള്‍ ഡിപ്പാര്‍ട്ട്മെന്റ് ഉദ്യോഗസ്ഥര്‍ എന്നിവര്‍ സ്ഥലത്തെത്തി.
