മലപ്പുറം: ജില്ലയിൽ രണ്ടിടങ്ങളിലായി വൻ കുഴൽപ്പണ വേട്ട. 58 ലക്ഷം രൂപയോളമാണ് പോലീസ് പിടിച്ചെടുത്തത്. സംഭവത്തിൽ രണ്ട് പേർ അറസ്റ്റിലായി. രഹസ്യ വിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് പ്രതികളെ പിടികൂടിയത്.
ഏക്കപ്പറമ്പിലെ വാഹന പരിശോധനയ്ക്കിടെ 22 ലക്ഷം രൂപയാണ് ആദ്യഘട്ടത്തിൽ പിടികൂടിയത്. സ്കൂട്ടറിൽ വരികയായിരുന്ന വേങ്ങര ഇരിങ്ങല്ലൂർ സ്വദേശി മുഹമ്മദ് കുട്ടിയിൽ നിന്നാണ് പണം പിടികൂടിയത്. 500 രൂപയുടെ നോട്ടുകളായിരുന്നു സ്കൂട്ടറിൽ ഉണ്ടായിരുന്നത്.
എടവണ്ണയിൽ പോലീസ് നടത്തിയ പരിശോധനയിൽ 35 ലക്ഷം രൂപ കണ്ടെടുത്തു. സംഭവത്തിൽ മഞ്ചേരി സ്വദേശി അബ്ദുൽ കരീമിനെ അറസ്റ്റ് ചെയ്തു. കാരക്കുന്ന്, എടവണ്ണ, നിലമ്പൂർ, പൂക്കോട്ടുംപാടം എന്നീ സ്ഥലങ്ങളിൽ കൊടുക്കുന്നതിനായി എത്തിച്ച പണമായിരുന്നു ഇതെന്ന് പ്രതി ചോദ്യം ചെയ്യലിൽ സമ്മതിച്ചു.
