ക്വാലലംപുര്‍: പുതിയ സീസണ്‍ ബാഡ്മിന്റണ്‍ ടൂര്‍ണമെന്റില്‍ ലോക രണ്ടാം നമ്പര്‍ പുരുഷ ഡബിള്‍സ് താരങ്ങളായ ഭാരതത്തിന്റെ സാത്വിക് സായിരാജ് രങ്കിറെഡ്ഡി-ചിരാഗ് ഷെട്ടി സഖ്യം വിജയത്തോടെ തുടങ്ങി. മലേഷ്യന്‍ ഓപ്പണ്‍ സൂപ്പര്‍ 1000 ടൂര്‍ണമെന്റില്‍ ഇരുവരും രണ്ടാം റൗണ്ടില്‍ പ്രവേശിച്ചു. കടുപ്പമേറിയ ആദ്യ റൗണ്ടില്‍ ഇന്തോനേഷ്യന്‍ സഖ്യത്തെയാണ് തോല്‍പ്പിച്ചത്. അതേസമയം പുരുഷ സിംഗിള്‍സില്‍ ഭാരതത്തിന്റെ എച്ച്.എസ്. പ്രണോയ് ആദ്യ റൗണ്ടില്‍ തോറ്റ് പുറത്തായി.
ഇന്തോനേഷ്യന്‍ ജോഡികളായ ഷൊഹിബുല്‍ ഫിക്രി- മൗലാനാ ബഗാസ് സഖ്യത്തെയാണ് ഭാരതത്തിന്റെ സാത്വികും ചിരാഗും ചേര്‍ന്ന് ആദ്യ റൗണ്ട് പുരുഷ ഡബിള്‍സില്‍ കീഴടക്കിയത്. ജയം നേരിട്ടുള്ള ഗെയിമിനായിരുന്നെങ്കിലും വലിയ സമ്മര്‍ദ്ദത്തിനൊടുവിലാണ് മത്സരം വരുതിയിലാക്കിയത്. സ്‌കോര്‍: 21-18, 21-19.
ഹാങ്‌ചൊ ഏഷ്യന്‍ ഗെയിംസില്‍ വെങ്കല നേട്ടം കൈവരിച്ച മലയാളി താരം എച്ച്.എസ്. പ്രണോയ് ഡെന്‍മാര്‍ക്ക് താരത്തോടാണ് ആദ്യ റൗണ്ടില്‍ തന്നെ പരാജയപ്പെട്ടത്. ലോക എട്ടാം നമ്പര്‍ താരമായ പ്രണോയി തന്നെക്കാള്‍ ഒരു റാങ്ക് പിന്നിലുള്ള ആന്‍ഡേഴ്‌സണ്‍ ആന്റോന്‍സെനിനോട് വമ്പന്‍ തോല്‍വി ഏറ്റുവാങ്ങുകയായിരുന്നു. വെറും 43 മിനിറ്റില്‍ പ്രണോയിയുടെ പോരാട്ടം തീര്‍ന്നു. സ്‌കോര്‍: 14-21, 11-21.
പ്രതികരിക്കാൻ ഇവിടെ എഴുതുക: