കണ്ടുനില്ക്കെ കണ്ണീര് പൊടിഞ്ഞു. എനിക്ക് മാത്രമായിരുന്നില്ല ആ അനുഭവം… ആയിരക്കണക്കിന് കര്സേവകര്ക്കും അതേ അനുഭൂതിയായിരുന്നു. ജയ് ശ്രീറാം വിളിക്കുമ്പോള് പലരും വിതുമ്പുന്നുണ്ടായിരുന്നു. ആ കരച്ചില് അഭിമാനത്തിന്റെയും ആനന്ദത്തിന്റെയും ആധിക്യം കൊണ്ട് ഞങ്ങളിലുണ്ടായതായിരുന്നു… എന്തൊരു അത്ഭുകരമായ ദൃശ്യമായിരുന്നു അത്.
1992 ഡിസംബര് ആറിന്റെ രാത്രി… തര്ക്കമന്ദിരം തകര്ന്നതിന് തൊട്ടുപിന്നാലെ കര്സേവകര് ശ്രീരാമ ജന്മഭൂമിയില് ഒരു താത്കാലിക ക്ഷേത്രം നിര്മ്മിച്ചു. അവിടെ ബാലകരാമനെ പ്രതിഷ്ഠിച്ചു. എല്ലാം ആ രാത്രിയില്ത്തന്നെ സംഭവിച്ചു. ഞങ്ങളുടെ കണ്മുന്നിലായിരുന്നു അത്… നൂറുകണക്കിനു വര്ഷത്തെ അടിമത്തത്തില് നിന്ന് ഒരാള് മോചിതനായതുപോലെ…. ഒരു പോരാട്ടം വിജയിക്കുന്നു. കാത്തിരുന്ന ആ മുഹൂര്ത്തം കണ്മുന്നില്… കണ്ണുനിറയാതെങ്ങനെ…
ഞാനന്ന് ആര്എസ്എസിന്റെ പട്യാല വിഭാഗ് കാര്യവാഹ് ആണ്. അനേകായിരം കര്സേവകരില് ഒരുവന്. ഇതാദ്യമായിരുന്നില്ല കര്സേവയ്ക്കായി ഞാന് അയോധ്യയിലെത്തുന്നത്. 1990ല് ഒരു ഈച്ചയെപ്പോലും അയോധ്യയിലേക്ക് കടത്തില്ലെന്ന് വാശികെട്ടിയ മുലായം സിങ് യാദവ് ഉത്തര്പ്രദേശ് ഭരിക്കുമ്പോള് പതിനായിരക്കണക്കിന് കര്സേവകരാണ് രാമദൗത്യത്തിനായെത്തിയത്. പ്രക്ഷോഭത്തിനിടെ ബുലന്ദ്ഷഹറില് വച്ച് അറസ്റ്റിലായി. നാല് ദിവസം ജയിലില് കിടന്നു. പക്ഷേ മനോവീര്യം കുറഞ്ഞില്ല. രാമജന്മഭൂമി മുക്തിപ്രസ്ഥാനം പിന്നെയും ശക്തി പ്രാപിച്ചു. 1992ലെ സമരകാലത്ത് ഡിസംബര് ഒന്നിന് തന്നെ ഞങ്ങള് അയോധ്യയിലെത്തി. കര്സേവകരെ നയിച്ചത് രാമന് എന്ന ഒറ്റവികാരമായിരുന്നു. തര്ക്കമന്ദിരത്തില് കര്സേവകരുടെ ശംഖ് മുഴങ്ങി. പൊടിപടലങ്ങള്ക്കിടയില് പുതിയ സൂര്യന് ഉദിച്ചു. ശ്രീരാമക്ഷേത്രത്തെ മറച്ചുകെട്ടിയ പഴയ മതിലുകള് പൊളിഞ്ഞപ്പോള് സത്യമാണ് മുന്നില് തെളിഞ്ഞത്. പുരാതനമായ നിരവധി വിഗ്രഹങ്ങള്, കൊത്തുപണികള്…. അത് എന്നും ക്ഷേത്രമായിരുന്നെന്ന സത്യം.
രണ്ട് ലക്ഷത്തോളം കര്സേവകര് അന്ന് അയോധ്യയിലുണ്ടായിരുന്നു എന്നാണ് ഞാന് കരുതുന്നത്. കര്സേവയ്ക്ക് ശേഷവും പതിനായിരത്തോളം പേര് അവിടെ തങ്ങി. മറ്റുള്ളവര് അവരുടെ ഗ്രാമങ്ങളിലേക്ക് മടങ്ങി. ഡിസംബര് 12 വരെ ഞങ്ങള് അവിടെ തുടര്ന്നു. ഒറ്റരാത്രികൊണ്ട് ഞങ്ങള് താത്കാലിക ക്ഷേത്രം നിര്മ്മിച്ചു. ശേഷം ക്ഷേത്രത്തിന്റെ ക്രമീകരണങ്ങള് പൂര്ത്തിയാക്കാന് കുറച്ച് സമയമെടുത്തു. എല്ലാ തടസവും നീങ്ങി മഹാക്ഷേത്രം ഉടന് നിര്മ്മിക്കുമെന്നാണ് അന്ന് ഞങ്ങള് പ്രതീക്ഷിച്ചത്. എന്നാല് പിന്നെയും കാത്തിരിപ്പിന്റെ നാളുകള്… നിയമയുദ്ധം. ഒടുവില് വിജയമെത്തുന്നു. എല്ലാവരുടെയും അംഗീകാരത്തോടെ ബാലകരാമന് പ്രതിഷ്ഠിക്കപ്പെടുന്നു.
ജനുവരി 22 ദേശീയ അഭിമാന ദിനമായിരിക്കും. എനിക്ക് അതിശയമാണ്… ഞാന് ആ ദ്യശ്യം കാണാന് ജീവിച്ചിരിക്കുന്നു. എന്തൊരു ഭാഗ്യമാണിത്. ആയിരക്കണക്കിന് രാമഭക്തരുടെ ത്യാഗം വിജയത്തിലെത്തുന്നു. ഈ സന്തോഷം വാക്കുകളിലെങ്ങനെ ഞാന് വിസ്തരിക്കും. ഒരോ കര്സേവകന്റെയും ജീവിതം വിജയിച്ചിരിക്കുന്നു. കര്സേവകനാകാന് കഴിയുക എന്നത് പൂര്വജന്മത്തില് ചെയ്ത പുണ്യമല്ലാതെ മറ്റെന്താണ്!
പവന് ജിന്ഡാല് (ആര്എസ്എസ് ഹരിയാന പ്രാന്ത സംഘചാലക്)
