തിരുവനന്തപുരം: വർക്കലയിൽ പഴംപൊരിയ്ക്ക് രുചിയില്ലെന്നതിൽ തുടങ്ങിയ തർക്കം കത്തിക്കുത്തിൽ കലാശിച്ചു. ചായക്കടയിലിരുന്നപ്പോഴുണ്ടായ വാക്ക് തർക്കത്തിനിടെ കത്തി ഉപയോഗിച്ച് യുവാവിനെ ആക്രമിച്ച അൽത്താഫിനെ പോലീസ് അറസ്റ്റ് ചെയ്തു. മേൽവെട്ടൂർ ജംഗ്ഷനിലെ ചായക്കടയിൽ വ്യാഴാഴ്ച വൈകിട്ടാണ് സംഭവം. വെട്ടൂർ സ്വദേശി രാഹുലിനാണ് കുത്തേറ്റത്.
ചായക്കടയിലെ പഴംപൊരിയ്ക്ക് രുചിയില്ലെന്ന കാര്യം കടയുടമയുമായി രാഹുൽ സംസാരിക്കവെയാണ് ആക്രമണം. ഇരുവരും തമ്മിൽ സംസാരിക്കവെ കടയിൽ ചായ കുടിക്കാനെത്തിയ അൽത്താഫ് പ്രശ്നത്തിൽ ഇടപെട്ടു. പിന്നാലെ രാഹുലും പ്രതിയും തമ്മിൽ വാക്കു തർക്കത്തിൽ ഏർപ്പെടുകയായിരുന്നു. ഈ സമയം കയ്യിൽ കരുതിയ കത്തി എടുത്ത് പ്രതി രാഹുലിന്റെ മുതുകത്ത് കുത്തി പരിക്കേൽപ്പിച്ചു.
രാഹുൽ പാരിപ്പള്ളി മെഡിക്കൽ കോളേജ് ആശുപത്രിയിൽ ചികിത്സയിലാണ്. അൽത്താഫ് കൊലപാതക ശ്രമത്തിലുൾപ്പെടെ നിരവധി കേസുകളിൽ പ്രതിയാണെന്ന് പോലീസ് പറയുന്നു.
