കൊല്ലം: ഒറ്റ രാത്രികൊണ്ട് തലവൂരിലെ എട്ടു വീടുകളിൽ നിന്നും മോട്ടോർ കവർന്ന മോഷ്ടാവ് അറസ്റ്റിൽ. മോട്ടോർ മോഷ്ടിച്ച് കടത്തിയ സംഭവത്തിലെ പ്രതികളെയാണ് കുന്നിക്കോട് പോലീസ് പിടികൂടിയത്. രണ്ടംഗ സംഘത്തിലെ പ്രധാന പ്രതി പതിനാറുകാരനെന്നത് ഉദ്യോഗസ്ഥരെ ഞെ്ട്ടിച്ചു. ബൈക്ക് മോഷ്ടിച്ച് രൂപമാറ്റം വരുത്തിയ കേസിവും കോടവട്ടം സ്വദേശിയായ 16-കാരൻ പ്രതിയാണ്. പിടവൂർ കമുകുംചേരി മനുഭവനിൽ മനോജാണ് പിടിയിലായ സംഘത്തിലെ സഹായി.
ഈ കഴിഞ്ഞ ശനിയാഴ്ച രാത്രിയും ഞായറാഴ്ച പുലർച്ചെയുമാണ് കേസിന് ആസ്പദമായ സംഭവം. മേലേപ്പുര, നടുത്തേരി, നെടുവന്നൂർ, കുണ്ടറപ്പടി എന്നിവിടങ്ങളിലെ വീടുകളിൽ നിന്നും മോട്ടോർ മോഷണം പോയിരുന്നു. പിവിസി പൈപ്പുകളിൽ നിന്നും ഇവ അറുത്ത് മാറ്റിയാണ് ഇരുവരും ചേർന്ന് മനോജിന്റെ ഗുഡ്സ് കാരിയർ ഓട്ടോറിക്ഷയിൽ കടത്തിയത്.
മോഷ്ടിച്ച വസ്തുവും കടത്താൻ ഉപയോഗിച്ച വാഹനവും പോലീസ് കണ്ടെത്തിയിട്ടുണ്ട്. മോട്ടോറുകൾ കൊട്ടാരക്കരയിലെയും പരിസര പ്രദേശങ്ങളിലെയും ആക്രികടകളിൽ വിറ്റതായി പോലീസ് പറയുന്നു. സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രതികളെ സ്ഥിരീകരിച്ചത്.
