കൊല്ലം: ഓയൂരില്‍ നിന്ന് ആറ് വയസുകാരിയെ തട്ടിക്കൊണ്ടുപോയ സംഭവത്തില്‍ കുട്ടിയുടെ പിതാവുമായി ബന്ധപ്പെട്ട കേന്ദ്രങ്ങളിലും അന്വേഷണം. കുട്ടിയുടെ പിതാവ് താമസിച്ചിരുന്ന പത്തനംതിട്ട നഗരത്തിലെ ഫ്‌ലാറ്റ് പ്രത്യേക പൊലീസ് സംഘം പരിശോധിച്ചു.
പത്തനംതിട്ടയിലെ സ്വകാര്യ ആശുപത്രിയിലാണ് കുട്ടിയുടെ പിതാവായ റെജി ജോലി ചെയ്യുന്നത്. റെജിയുടെ ഒരു ഫോണ്‍ അന്വേഷണസംഘം കൊണ്ടുപോയെന്നാണ് വിവരം.
കുട്ടിയെ തട്ടിക്കൊണ്ടു പോയ സംഭവത്തില്‍ പ്രതികള്‍ക്കായി നാല് ദിവസമായി അന്വേഷണം നടത്തുന്ന പൊലീസിന് തുമ്പൊന്നും ലഭിച്ചിട്ടില്ല.ഈ സാഹചര്യത്തില്‍ എല്ലാ സാധ്യതകളും ആരായുകയാണ് അന്വേഷണ സംഘം.
പത്തനംതിട്ട നഗരത്തിലെ സ്വകാര്യ ആശുപത്രിയിലാണ് കഴിഞ്ഞ 10 വര്‍ഷമായി റെജി ജോലി ചെയ്യുന്നത്. ഇതിന് സമീപമുളള ഫ്‌ലാറ്റിലാണ് റെജി താമസിച്ചിരുന്നത്. ഇവിടെയാണ് ഇന്ന് വൈകിട്ടോടെ പൊലീസ് പരിശോധിച്ചത്.
