ആളൂര്‍: വിജയ് ഹസാരെ ട്രോഫി ക്രിക്കറ്റില്‍ കേരളം ഇന്ന് നാലാമങ്കത്തിന്. ത്രിപുരയാണ് എതിരാളികള്‍. ടൂര്‍ണമെന്റില്‍ ഇതുവരെ ഇരുവരും കളിച്ച മൂന്ന് കളികളില്‍ രണ്ടെണ്ണം വീതം ജയിച്ച് എട്ട് പോയിന്റ് സ്വന്തമാക്കിയിട്ടുണ്ട്. റണ്‍നിരക്കില്‍ ത്രിപുര കേരളത്തെക്കാള്‍ മുന്നിലെത്തി. കളിച്ച മൂന്ന് കളികളും ജയിച്ച മുംബൈ ആണ് പട്ടികയില്‍ മുന്നില്‍.
ഇതുവരെ കളിച്ചതില്‍ മുംബൈയോട് മാത്രമാണ് കേരളം പരാജയപ്പെട്ടിട്ടുള്ളത്. നിലവിലെ ചാമ്പ്യന്‍മാരായ സൗരാഷ്‌ട്രയെ തോല്‍പ്പിച്ചിരുന്നു. കഴിഞ്ഞ ദിവസം നടന്ന കളിയില്‍ ഒഡീഷയെയും കീഴടക്കി. കഴിഞ്ഞ ദിവസം നടന്ന മത്സരത്തില്‍ ത്രിപുരയും സൗരാഷ്‌ട്രയെ തോല്‍പ്പിച്ചിരുന്നു. കേരളം പട്ടികയില്‍ മൂന്നാം സ്ഥാനത്താണ്. എട്ട് ടീമുകളടങ്ങിയ ഗ്രൂപ്പ് എയിലാണ് കേരളം ഉള്‍പ്പെട്ടിരിക്കുന്നത്.
ഇന്ന് കേരളവും ത്രിപുരയും നേര്‍ക്കുനേര്‍ വരുമ്പോള്‍ തുല്യശക്തികളുടെ പോരാട്ടമായിരിക്കുമെന്നാണ് വിലയിരുത്തല്‍. കേരളത്തെയും ത്രിപുരയെയും കൂടാതെ പുതുചേരിയും രണ്ട് മത്സരം വീതം ജയിച്ച് എട്ട് പോയിന്റ് സ്വന്തമാക്കിയിട്ടുണ്ട്. നിലവിലെ ചാമ്പ്യന്‍മാരായ സൗരാഷ്‌ട്രയ്‌ക്ക് ഇത്തവണ ഇതുവരെ കളിച്ച മൂന്ന് മത്സരങ്ങളില്‍ നിന്ന് ഒരെണ്ണത്തിലേ വിജയിക്കാനായിട്ടുള്ളൂ. ഇന്ന് നടക്കുന്ന എല്ലാ മത്സരങ്ങളും രാവിലെ 9ന് ആരംഭിക്കും. ഇന്ന് കേരളത്തിന്റേതടക്കം ഒമ്പത് മത്സരങ്ങളാണ് നടക്കുക.
