ടെക്സസ്(അമേരിക്ക): ലോക വുഷു ചാമ്പ്യന്ഷിപ്പില് ഭാരതത്തിന്റെ വനിതാ താരം റോഷിബിന ദേവിക്ക് വെള്ളി. ഫൈനലിലെത്തിയ റോഷിബിന വിയെറ്റ്നാമിന്റെ തി തുന്യൂയെനിനോട് പരാജയപ്പെട്ടതോടെയാണ് വെള്ളി നേട്ടത്തിനര്ഹയായത്. വനിതകളുടെ 60 കിലോ വിഭാഗത്തിലായിരുന്നു റോഷിബിനയുടെ പോരാട്ടം. ഹാങ്ചൊ ഏഷ്യന് ഗെയിംസ് വെള്ളി മെഡല് ജേത്രിയാണ് റോഷിബിന.
നേരത്തെ സെമി പോരാട്ടത്തില് മറ്റൊരു വിയെറ്റ്നാം താരത്തെ മറികടന്നാണ് റോഷിബിന സ്വര്ണപോരിന് യോഗ്യത നേടിയെടുത്തത്. ചാമ്പ്യന്ഷിപ്പില് ഭാരതത്തിന്റെ ഏറ്റവും ഉയര്ന്ന നേട്ടമാണ് റോഷിബിന സ്വന്തമാക്കിയ വെള്ളിനേട്ടം. ഭാരതത്തിന്റെ മൂന്ന് മെഡലുകളില് രണ്ട് വെങ്കലമാണ് മറ്റ് നേട്ടങ്ങള്.
48 കിലോ വിഭാഗം പുരുഷ ഇനത്തില് കുശാല് കുമാര് വെങ്കലം നേടി. സെമിയില് ഹയി ട്രാന് ഹുയ് ആണ് കുശാലിനെ തോല്പ്പിച്ചത്. വനിതകളുടെ 48 കിലോ വിഭാഗത്തില് ഛാവിയാണ് ഭാരതത്തിനായി മറ്റൊരു വെങ്കല മെഡല് സ്വന്തമാക്കിയത്. സെമിയില് ഫിലിപ്പൈന്സിന്റെ ജെന്നിഫര് കിലാപിയോ ആണ് ഛാവിയെ തോല്പ്പിച്ചത്.
