ബംഗളൂരു: ലോകകപ്പ് ക്രിക്കറ്റില് ഭാരത നായകന് രോഹിത് ശര്മയ്ക്ക് റിക്കാര്ഡ്. ഒരു ലോകകപ്പില് ഏറ്റവും കൂടുതല് സിക്സുകള് നേടുന്ന നായകനെന്ന റിക്കാര്ഡാണ് രോഹിത് നെതര്ലന്ഡ്സിനെതിരായ മത്സരത്തിനിടെ സ്വന്തമാക്കിയത്. ഈ മത്സരത്തില് 54 പന്തില് 61 റണ്സെടുത്താണ് രോഹിത് മടങ്ങുന്നത്. ഇന്നിംഗ്സില് രണ്ട് സിക്സുകളുണ്ടായിരുന്നു. ഇതോടെ രോഹിത്തിന് ഈ ലോകകപ്പില് 24 സിക്സുകളായി. 2019 ലോകകപ്പില് 22 സിക്സുകള് നേടിയ ഇംഗ്ലണ്ട് മുന് നായകന് ഇയോണ് മോര്ഗനെയാണ് രോഹിത് മറികടന്നത്. ഇക്കാര്യത്തില് എബി ഡിവില്ലിയേഴ്സ് (22, 2015), ആരോണ് ഫിഞ്ച് (18 , 2019), ബ്രന്ഡന് മക്കല്ലം (17, 2015) എന്നിവരാണ് രണ്ട് മുതല് അഞ്ച് വരെയുള്ള സ്ഥാനങ്ങളില്.
അതേസമയം, ലോകകപ്പില് ഏറ്റവും കൂടുതല് തവണ 50-ല് കൂടുതല് റണ്സ് നേടിയ താരങ്ങളില് രോഹിത് മൂന്നാമതെത്തി. 26 ഇന്നിങ്സുകളില് നിന്നായി 13 തവണയാണ് രോഹിത് 50-ല് കൂടുതല് റണ്സ് നേടിയത്. 21 തവണ അമ്പതിലധികം സ്കോര് നേടിയ സച്ചിന് തെണ്ടുല്ക്കറാണ് ഒന്നാമന്. വിരാട് കോഹ്ലി (15) രണ്ടാം സ്ഥാനത്തുണ്ട്. കേഹ്ലി 36 ഇന്നിങ്സില് നിന്നാണ് ഇത്രയും നേടിയത്. സച്ചിന് 44 ഇന്നിംഗ്സില് നിന്നും. ഷാക്കിബ് അല് ഹസന് (13), കുമാര് സംഗക്കാര (12) എന്നിവരും പട്ടികയിലുണ്ട്.
നെതര്ലന്ഡ്സിനെതിരായ കളിയില് രോഹിത്-ശുഭ്മാന് ഗില് സഖ്യം മറ്റൊരു റിക്കാര്ഡും സ്വന്തമാക്കി. ഈ വര്ഷം ഏറ്റവും കൂടുതല് തവണ 100 റണ്സ് കൂട്ടുകെട്ടുണ്ടാക്കിയത് ഈ സഖ്യമാണ്. ഈ വര്ഷം അഞ്ചാം തവണയാണ് ഇരുവരും സെഞ്ചുറി കൂട്ടുകെട്ടുണ്ടാക്കുന്നത്.
അഫ്ഗാന്റെ ഇബ്രാഹിം സദ്രാന്-റഹ്മാനുള്ള ഗുര്ബാസ്
(4), ശ്രീലങ്കയുടെ ദിമുത് കരുണരത്നെ-പതും നിസ്സങ്ക (3), കുശാല് മെന്ഡിസ്-സധീര സമരവിക്രമ (3) എന്നിവര് പിന്നിലായി.
