ദുബായ്: ന്യൂസിലന്‍ഡ് ബാറ്റര്‍ രചിന്‍ രവീന്ദ്രയും വെസ്റ്റിന്‍ഡീസ് വനിതാ താരം ഹെയ്‌ലി മാത്യൂസും മാസത്തിലെ മികച്ച താരത്തിനുള്ള ഐസിസി പുരസ്‌കാരത്തിന് തെരഞ്ഞെടുക്കപ്പെട്ടു. ഇന്നലെയാണ് ഐസിസിയുടെ ഒക്ടോബര്‍ മാസത്തെ പുരസ്‌കാര പ്രഖ്യാപനം വന്നത്.
23കാരനായ രചിന്‍ രവീന്ദ്രയുടെ കരിയറിലെ ആദ്യത്തെ പുരുഷ ക്രിക്കറ്റ് താരത്തിനുള്ള ഐസിസി പുരസ്‌കാരമാണിത്. ലോകകപ്പ് പ്രാഥമിക ഘട്ടത്തില്‍ ന്യൂസിലന്‍ഡിന്
വേണ്ടി തകര്‍പ്പന്‍ പ്രകടനം കാഴ്‌ച്ചവച്ചതാണ് താരത്തിന് തുണയായത്. 81.20 ശരാശരിയില്‍ 406 റണ്‍സാണ് അടിച്ചുകൂട്ടിയത് (പുരസ്‌കാരത്തിന് പരിഗണിക്കുംവരെ). ഇംഗ്ലണ്ടിനെതിരെയും(പുറത്താകാതെ 123) ഓസ്‌ട്രേലിയക്കെതിരെയും(116) സെഞ്ചുറിയടിച്ചു.
വിന്‍ഡീസ് വനിതാ താരം ഹെയ്‌ലി മാത്യൂസ് കരിയറില്‍ രണ്ടാം തവണയാണ് ഐസിസിയുടെ മാസത്തിലെ മികച്ച താരത്തിനുള്ള പുരസ്‌കാരം സ്വന്തമാക്കുന്നത്. ഓസ്‌ട്രേലിയക്കെതിരായ ട്വന്റി20 പരമ്പരയില്‍ വിന്‍ഡീസിനായി അത്യുഗ്രന്‍ പ്രകടനം കാഴ്‌ച്ചവച്ചിരുന്നു. പരമ്പരയില്‍ 310 റണ്‍സെടുത്ത താരം ഒരു മത്സരത്തില്‍ പുറത്താകാതെ 132 റണ്‍സെടുക്കുയും ചെയ്തു.
