ന്യൂഡൽഹി: മൂന്ന് മുതൽ 12 വരെയുള്ള ക്ലാസുകളിലെ പാഠ്യപദ്ധതികളിൽ ഭാരതീയ ദർശനവുമായി ബന്ധപ്പെട്ട പാഠങ്ങൾ ഉൾപ്പെടുത്താനൊരുങ്ങി എൻസഇആർടി. ഇത് സംബന്ധിച്ച് പാഠങ്ങൾ ഉൾപ്പെടുത്തുന്നതിനായി 19 അംഗ സമിതിയെയാണ് രൂപവത്കരിച്ചിരിക്കുന്നത്.
ചെന്നൈയിലെ സെന്റർ ഫോർ പോളിസി സ്റ്റഡീസ് ചെയർമാൻ എംഡി ശ്രീനിവാസ് ആണ് സമിതിയുടെ അദ്ധ്യക്ഷൻ. ഓരോ വിഷയത്തിലും ഭാരതീയ തത്ത്വശാസ്ത്രവുമായി ബന്ധപ്പെട്ടവ കണ്ടെത്തി പാഠഭാഗങ്ങളിൽ ഉൾപ്പെടുത്തുന്നതായിരിക്കും. ഐ.ഐ.ടി.-ഗാന്ധിനഗറിലെ വിസിറ്റിങ് പ്രൊഫസറും എൻ.എസ്.ടി.സി .അംഗവുമായ മൈക്കൽ ഡാനിനോ, പ്രിൻസ്റ്റണിലെ പ്രൊഫസർ മഞ്ജുൾ ഭാർഗവ്, എൻ.എസ്.ടി.സി. കോ-ചെയർപേഴ്‌സൺ വി രാമനാഥൻ എന്നിവരാണ് സമിതിയിലുള്ള മറ്റ് അംഗങ്ങൾ.
ഇന്ത്യൻ സംസ്‌കാരം, വേദങ്ങൾ, കല, വാസ്തുവിദ്യ, ഇതിഹാസങ്ങൾ എന്നിവ ഉൾപ്പെടുത്തി ഹിന്ദി, ഇംഗ്ലീഷ്, ഉറുദു ഭാഷകളിലാകും രേഖകൾ തയാറാക്കുക. നവംബർ 20-നകം എൻ.സി.ഇ.ആർ.ടി., എൻ.എസ്.ടി.സി. എന്നിവയ്‌ക്ക് പാഠ്യപദ്ധതി സമർപ്പിക്കും. പാഠപുസ്തകങ്ങളുടെയും അധ്യാപന- പഠന സാമഗ്രികളുടെയും ആദ്യ കരട് ഡിസംബർ 31-ന് മുമ്പ് സമർപ്പിക്കും. അവസാന പതിപ്പുകൾ 2023 ജനുവരി 31-നുള്ളിൽ പുറത്തിറക്കും.
