നവി മുംബയ് : സയ്യിദ് മുഷ്താഖ് അലി ട്വന്റി 20 ടൂര്‍ണമെന്റില്‍ നോക്കൗട്ട് ഉറപ്പിച്ച് കേരളം. ഇന്നു നടന്ന മത്സരത്തില്‍ ഒഡീഷയെ 50 റണ്‍സിനാണ് തോല്‍പ്പിച്ചത്.തുടര്‍ച്ചയായി ആറാം മത്സരത്തിലാണ് കേരളം വിജയിക്കുന്നത്.
ആദ്യം ബാറ്റ് ചെയ്ത കേരളം 20 ഓവറില്‍ 184 റണ്‍സ് നേടി. മറുപടി ബാറ്റിംഗില്‍ ഒഡീഷ 133 റണ്ണിന് പുറത്തായി.
വിജയത്തോടെ എലൈറ്റ് ഗ്രൂപ്പ് സിയില്‍ 24 പോയിന്റുമായി ഒന്നാം സ്ഥാനം നിലനിര്‍ത്തിയിരിക്കുയാണ് കേരളം. കേരളത്തിനായി ജലജ് സക്‌സേന അഞ്ച് വിക്കറ്റും ശ്രേയസ് ഗോപാല്‍ നാല് വിക്കറ്റും വീഴ്‌ത്തി. ബേസില്‍ തമ്പി ഒരു വിക്കറ്റ്െടുത്തു.
ക്യാപ്റ്റന്‍ സഞ്ജു സാംസണ്‍ 31 പന്തില്‍ നിന്ന് 55 റണ്‍സ് നേടി.വരുണ്‍ നായര്‍ 38 പന്തില്‍ നിന്ന് 48 റണ്‍സ് എടുത്തു.
വിഷ്ണു വിനോദ് 35 റണ്‍സ്, രോഹന്‍ എസ് കുന്നുമ്മല്‍ 16, ബാസിത് 5 എന്നിങ്ങനെ ആയിരുന്നു മറ്റ് ബാറ്റര്‍മാരുടെ സ്‌കോറുകള്‍.
ഒഡീഷയ്‌ക്ക് വേണ്ടി 23 പന്തില്‍ നാലു ഫോറും ഒരു സിക്‌സും ഉള്‍പ്പെടെ 37 റണ്‍സെടുത്ത സുബ്രാന്‍ഷു സേനാപതി ടോപ് സ്‌കോററായി. ക്യാപ്റ്റന്‍ ഗോവിന്ദ പോഡര്‍ (20 പന്തില്‍ 27), രാജേഷ് ധൂപര്‍ (19 പന്തില്‍ 28) എന്നിവരും മികച്ച രീതിയില്‍ ബാറ്റ് വീശി.
