കോടതി കുറ്റക്കാരനാണെന്ന് കണ്ടെത്തുന്നതുവരെ ആരെയും കുറ്റവാളിയായി കാണരുതെന്ന് നടന്‍ സുരേഷ് ഗോപി. സ്വപ്നാ സുരേഷിന്റെയും ദിലീപിന്റെയും കേസുകളില്‍ ഇതാണ് തന്റെ നിലപാടെന്നും തന്റെ രാഷ്‌ട്രീയ നിലപാട് നോക്കി ആരും സിനിമ വിലയിരുത്താറില്ല എന്നും സുരേഷ് ഗോപി ദുബായില്‍ മാധ്യമങ്ങളോട് പറഞ്ഞു.
അന്തിമവിധി വരുന്നതുവരെ ആരും കുറ്റക്കാരല്ല. ചിലരെ മനഃപൂര്‍വം പ്രതികളാക്കുന്ന വിധത്തില്‍ പോലീസ് നടപടികള്‍ ഉണ്ടാകുന്നുണ്ട്. രാജ്യത്തിന്റെ നിയമവ്യവസ്ഥയില്‍ പോലും മാറ്റങ്ങള്‍ വരുത്താന്‍ സാധ്യതയുള്ളതാണ് തന്റെ പുതിയ ചിത്രമായ ഗരുഡനെന്നും സുരേഷ് ഗോപി പറഞ്ഞു.
ബിനീഷ് കോടിയേരിയുടെ കാര്യമായാലും ദിലീപിന്റെ കാര്യമായാലും സ്വപ്നാ സുരേഷിന്റെ കാര്യമായാലും കോടതി പറയണം. അത് വരെ ഞാന്‍ വിശ്വസിക്കില്ല. കോടതി പറയട്ടെ, അതല്ലേ നമ്മുടെ നാട്ടില്‍ ലോ ഓഫ് ദ ലാന്‍ഡ് അദ്ദേഹം ചോദിച്ചു.
‘ഗരുഡന്‍’ എന്ന തന്റെ പുതിയ ചിത്രത്തിന്റെ പ്രചാരണവുമായി ബന്ധപ്പെട്ടാണ് സുരേഷ് ഗോപി ദുബായില്‍ എത്തിയത്. ഗരുഡന്‍ എന്ന ചിത്രത്തിലും പൊലീസ് വേഷത്തില്‍ ആണ് സുരേഷ് ഗോപി എത്തുന്നത്.
സുരേഷ് ഗോപിയ്‌ക്കൊപ്പം മറ്റ് താരങ്ങളും എത്തിയിരുന്നു. മലയാള സിനിമയിലേക്കുള്ള തിരിച്ചുവരവില്‍ ഏറെ സന്തോഷമുണ്ടെന്ന് നടി അഭിരാമി പറഞ്ഞു. നടന്‍ സിദ്ദിഖ്, നടി ദിവ്യാ പിള്ള, സംവിധായകന്‍ അരുണ്‍ വര്‍മ എന്നിവരും വാര്‍ത്താസമ്മേളനത്തില്‍ പങ്കെടുത്തു.
നീണ്ടകാലത്തിന് ശേഷം സുരേഷ് ഗോപിയും ബിജു മേനോനും ഒന്നിക്കുന്ന ചിത്രം കൂടിയാണ് ഗരുഡന്‍. അരുണ്‍ വര്‍മ്മ സംവിധാനം ചെയ്യുന്ന ചിത്രത്തിന് തിരക്കഥ ഒരുക്കുന്നത് മിഥുന്‍ മാനുവല്‍ തോമസ് ആണ്. അഞ്ചാം പാതിര എന്ന സൂപ്പര്‍ ഹിറ്റ് ചിത്രത്തിന് ശേഷം മിഥുന്‍ തിരക്കഥ ഒരുക്കുന്നത് കൊണ്ടുതന്നെ ഗരുഡന്റെ പ്രേക്ഷ പ്രതീക്ഷ വലുതാണ്.
ലീഗല്‍ ത്രില്ലര്‍ മൂഡിലുള്ള ചിത്രത്തില്‍ കേരള ആംഡ് പൊലീസിന്റെ കമാന്റന്റ് ആയ ഹരീഷ് മാധവന്‍ എന്ന കഥാപാത്രത്തെ ആണ് സുരേഷ് ഗോപി അവതരിപ്പിക്കുന്നത്. നിഷാന്ത് എന്ന കോളേജ് പ്രൊഫസറുടെ വേഷം ബിജുമേനോന്‍ കൈകാര്യം ചെയ്യുന്നു. ലിസ്റ്റിന്‍ സ്റ്റീഫന്റെ നേതൃത്വത്തില്‍ മാജിക് ഫ്രെയിംസ് ആണ് ഗരുഡന്റെ നിര്‍മാണം.
