വിജയ് നായകനായി എത്തിയ ലിയോ പ്രതീക്ഷകള്‍ക്കപ്പുറമുള്ള റെക്കോര്‍ഡ് വിജയത്തിലേക്കുള്ള കുതിപ്പിലാണ്. ആദ്യ ദിന കളക്ഷന്റെ കാര്യത്തിലുള്‍പ്പടെ റെക്കോര്‍ഡുകള്‍ ഭേധിച്ച് ചിത്രം പ്രദര്‍ശനം തുടരുകയാണ്. അപ്രതീക്ഷിത വിരുന്നായി മലയാളികള്‍ക്ക് മുന്നില്‍ എത്തിയ മഡോണയുടെ കഥാപാത്രവും ആഘോഷിക്കപ്പെടുകയാണ്….
എന്നാല്‍ ഹിറ്റ് തരംഗത്തില്‍ ഇപ്പോള്‍ സോഷ്യല്‍ മീഡിയയില്‍ മഡോണയുടെ ഫോട്ടോ ഷൂട്ടും തരംഗമാവുകയാണ്.
കറുപ്പണിഞ്ഞ് അതീവ സ്‌റ്റൈലിഷ് ലുക്കിലാണ് മഡോണ പ്രത്യക്ഷപ്പെടുന്നത്. ഫൊട്ടോഗ്രാഫര്‍ ഹരികുമാറിന്റെ ക്ലിക്കില്‍ കറിപ്പിലഴകായി ചിത്രങ്ങള്‍. ജോ എലിസ് ജോയ് ആണ് സ്‌റ്റൈലിങ്. ഐശ്വര്യ ലക്ഷ്മി ഉള്‍പ്പടെ നിരവധിപ്പേരാണ് നടിയെ പ്രശംസിച്ച് സോഷ്യല്‍ മീഡിയയില്‍ എത്തിയിരിക്കുന്നത്.
ഏറെ സര്‍പ്രൈസുകളോടെ എത്തിയ ലിയോയില്‍ മഡോണയുടെ വേഷം സിനിമ കണ്ടിറങ്ങിയവര്‍ ആഘോഷമാക്കുകയാണ്. സിനിമയില്‍ ഏറെ രഹസ്യമായി സൂക്ഷിച്ച കഥാപാത്രമായിരുന്നു മഡോണയുടെ എലിസാ ദാസ്. മഡോണപോലും രഹസ്യമായി സൂക്ഷിച്ച കഥാപാത്രം…
അത് രഹസ്യമാക്കി വെച്ചതിനെപ്പറ്റി ഒരു അഭിമുഖത്തില്‍ പറഞ്ഞതിങ്ങനെ.
‘ഞാന്‍ അധികം സംസാരിക്കുന്ന കൂട്ടത്തിലല്ല. അതുകൊണ്ടു തന്നെ ലിയോയില്‍ അഭിനയിച്ച കാര്യം രഹസ്യമാക്കി വയ്‌ക്കുന്നത് എന്നെ സംബന്ധിച്ച് ഓക്കെ ആയിരുന്നു. റിലീസിനു മുമ്പു വരെ ലോകേഷിനോടു ചോദിച്ചിരുന്നു, ഇനിയെങ്കിലും പറയാമോ? എന്ന്. ഓഡിയോ ലോഞ്ചിന് പോകാമെന്ന് തീരുമാനിച്ചിരുന്നു. പക്ഷേ ഓഡിയോ ലോഞ്ച് നടന്നില്ല. അതുകൊണ്ട് ഈ രഹസ്യം ഇങ്ങനെ മുന്നോട്ടുപോയി’, മഡോണ പറഞ്ഞു.
‘മൂന്ന് ദിവസം ഷൂട്ട് ഉണ്ടായിരുന്നു. ലിയോയില്‍ അഭിനയിക്കുന്ന കാര്യം ആകെ അറിയാമായിരുന്നത് അമ്മയ്‌ക്കാണ്. അല്ലാതെ അടുത്ത സുഹൃത്തുക്കളോടോ ബന്ധുക്കളോടോ പോലും പറഞ്ഞിരുന്നില്ല’, മഡോണ പറഞ്ഞു. റെഡ്‌നൂള്‍ എന്ന തമിഴ് ചാനലിന് നല്‍കിയ അഭിമുഖത്തിലാണ് ലിയോയുടെ വിശേഷം മഡോണ പങ്കുവെച്ചത്.
