ഏലൂര് (കൊച്ചി): കളമശേരി മഞ്ഞുമ്മല്-ചേരാനല്ലൂര് ഫെറി റോഡില് പെരിയാറിന്റെ കൈവഴിയില് സ്കൂട്ടര് യാത്രികരായ രണ്ടു പേര് മുങ്ങി മരിച്ചു. വ്യാഴാഴ്ച രാത്രി 10.45 കഴിഞ്ഞാണ് സംഭവം.
രാത്രി കടത്തു കടവില് എന്തോ വെള്ളത്തില് വീണ ശബ്ദം കെട്ട് വന്നു നോക്കിയ അടുത്തുള്ള വീട്ടുകാര് സ്കൂട്ടറിന്റെ രണ്ടു ഇന്ഡിക്കേറ്റര് മിന്നി തെളിയുന്നത് കണ്ടാണ് അപകടം അറിയുന്നത്. വിവരം പോലീസിനെയും അഗ്നി രക്ഷാ സേനയെയും അറിയിച്ചതിനെത്തുടര്ന്നുള്ള തെരച്ചിലില് ഒരാളുടെ മൃതദേഹം കണ്ടെത്തി. രണ്ടാമത്തേത് ഇന്നലെ രാവിലെയണ് കണ്ടെത്തിയത്.
ചേരാനല്ലൂര് ടിപ്പു സുല്ത്താന് റോഡില് കറുപ്പന് വീട്ടില് കുഞ്ഞു മരക്കാരുടെ മകന് മുഹമ്മദ് ആസാദ് (27), പുതു വൈപ്പ് അട്ടിപ്പേറ്റില് വീട്ടില് ജോസ് ലെന്സിന്റെ മകന് കെല്വിന് ആന്റണി (26)എന്നിവരാണ് മരിച്ചത്. മൃതദേഹങ്ങള് രാജഗിരി ആശുപത്രിയിലേക്ക് മാറ്റുകയും പോസ്റ്റ് മോര്ട്ടത്തിന് ശേഷം ബന്ധുക്കള്ക്ക് വിട്ടുകൊടുത്തു.
രണ്ടു പേരില് ഒരാളുടെ സ്കൂട്ടര് കടത്തുകടവിന് സമീപം ഇരുപ്പുണ്ടായിരുന്നു. ഇരു വാഹനങ്ങളും ഏലൂര് പോലീസ് സ്റ്റേഷനിലേക്ക് മാറ്റി. ഇവര് എങ്ങനെ പുഴയിലേക്ക് പോയി എന്നതിനെക്കുറിച്ച് ഏലൂര് പോലീസ് അന്വേഷിക്കുന്നുണ്ട്.
