പത്തനംതിട്ട: തിരുവല്ല അര്ബന് സഹ. ബാങ്കിലെ നിക്ഷേപ തട്ടിപ്പ് കേസില് മുന് മാനേജര് പ്രീത ഹരിദാസ് അറസ്റ്റില്. പ്രീതയുടെ മുന്കൂര് ജാമ്യം തള്ളിയ ഹൈക്കോടതി അന്വേഷണ ഉദ്യോഗസ്ഥന് മുന്നില് ഹാജരാകാന് നിര്ദേശിച്ചിരുന്നു. എന്നാല് ഇതിനു പിന്നാലെ പ്രീത ഒളിവില് പോവുകയായിരുന്നു. തുടര്ന്ന് ഇന്നലെ രാവിലെ പോലീസ് അറസ്റ്റ് ചെയ്തു.
2015 ലാണ് തിരുവല്ല മതില്ഭാഗം സ്വദേശി വിജയലക്ഷ്മി മോഹന് അര്ബന് സഹ. ബാങ്കിന്റെ മാഞ്ഞാടി ശാഖയില് മൂന്നര ലക്ഷം രൂപ നിക്ഷേപിച്ചത്. പലിശ ഉള്പ്പെടെ ആറേമുക്കാല് ലക്ഷം രൂപ 2022 ഒക്ടോബറില് പിന്വലിക്കാന് അപേക്ഷ നല്കി. നിക്ഷേപ രേഖകള് ഉള്പ്പെടെ വാങ്ങിവെച്ച ജീവനക്കാര് പണം തിരികെ നല്കിയില്ല.
തുടര്ന്നു നടത്തിയ അന്വേഷണത്തിലാണ് വ്യാജ ഒപ്പിട്ട് ബാങ്ക് ജീവനക്കാരി പണം തട്ടിയെന്ന് അറിയുന്നത്. പോലീസില് പരാതി നല്കിയെങ്കിലും അന്വേഷണം അട്ടിമറിച്ചു. മുതിര്ന്ന സിപിഎം നേതാവ് കൂടിയായ ബാങ്ക് ചെയര്മാന്റെ ഒത്താശയിലാണ് പണം തട്ടിയെന്നാണ് നിക്ഷേപക ആരോപിക്കുന്നത്.
