പത്തനംതിട്ട: ഏനാനല്ലൂർ മൂവാറ്റുപുഴ പുത്തില്ലത്ത് മന പിഎൻ മഹേഷ് ഇനി ശബരിമല മേൽശാന്തി. സന്നിധാനത്ത് നടന്ന നറുക്കെടുപ്പിലാണ് മേൽശാന്തിയായി അദ്ദേഹത്തെ തിരഞ്ഞെടുത്തത്. മാളികപ്പുറം മേൽശാന്തിയായി തിരഞ്ഞെടുത്തത് പിജി മുരളിയെയാണ്. തൃശൂർ സ്വദേശിയാണ് മുരളി. ആദ്യ നറുക്കിൽ തന്നെ മേൽശാന്തിയായി തിരഞ്ഞെടുക്കപ്പെടുകയായിരുന്നു മഹേഷ്.
17 പേരുകളാണ് ശബരിമല മേൽശാന്തിമാരുടെ അന്തിമ പട്ടികയിലുണ്ടായിരുന്നത്. ഇവരിൽ നിന്നാണ് മഹേഷിനെ നറുക്കെടുപ്പിലൂടെ തിരഞ്ഞെടുത്തത്. മാളികപ്പുറം മേൽശാന്തി പട്ടികയിൽ ഉണ്ടായിരുന്ന 12 പേരുകളിൽ നിന്നാണ് പിജി മുരളിയെ തിരഞ്ഞെടുത്തത്. തൂശൂർ തൊഴിയൂർ വടക്കേക്കാട്ട് പൂക്കാട്ട് മനയിലെ അംഗമാണ് അദ്ദേഹം. ഏഴാമത്തെ നറുക്കിലാണ് അദ്ദേഹം മേൽശാന്തിയായത്.
പന്തംളം കൊട്ടാരത്തിൽ നിന്നും കെട്ടുമുറുക്കി എത്തിയ വൈദേഹ് എം വർമയാണ് ശബരിമല മേൽശാന്തിമാരുടെ നറുക്കെടുത്തത്. നിരുപമ ജി വർമയാണ് മാളികപ്പുറത്തേക്കുള്ള മേൽശാന്തിയുടെ നറുക്കെടുത്തത്. വൃശ്ചികം ഒന്ന് മുതൽ അടുത്ത ഒരു വർഷത്തേക്കുള്ള സന്നിധാനം-മാളികപ്പുറം മേൽശാന്തിമാരുടെ നറുക്കെടുപ്പാണ് ഇന്ന് നടന്നത്.
