ആലപ്പുഴ: മദ്യപാനത്തെ തുടർന്നുണ്ടായ വാക്കേറ്റത്തിൽ സുഹൃത്തുക്കളുടെ മർദ്ദനമേറ്റ് യുവാവിന് ദാരുണാന്ത്യം. ആലപ്പുഴ ചെങ്ങന്നൂർ സ്വദേശി സജീവ് ആണ് മരിച്ചത്. ഇന്നലെ വൈകിട്ട് ആറരയോടെയായിരുന്നു സംഭവം. ചോപ്പാട് കാഞ്ഞൂർ ക്ഷേത്രത്തിന് സമീപത്ത് വെച്ചായിരുന്നു സംഭവം. മൂന്ന് പേരെയാണ് പോലീസ് അറസ്റ്റ് ചെയ്തത്.
മദ്യാപനത്തിനിടെ സുഹൃത്തുക്കളുമായി ഉണ്ടായ വാക്ക് തർക്കമാണ് മർദ്ദനത്തിന് കാരണമായത്. തുടർന്ന് അവശനിലയിലായ യുവാവിനെ പ്രതികൾ തന്നെയാണ് ആശുപത്രിയിൽ എത്തിച്ചത്. അപകടം സംഭവിച്ചതെന്നായിരുന്നു യുവാക്കൾ ആശുപത്രിയിൽ അറിയിച്ചത്.
സംശയം തോന്നി ആശുപത്രി ജീവനക്കാർ പ്രതികളെ തടഞ്ഞു നിർത്തുകയും പോലീസിൽ വിവരം അറിയിക്കുകയുമായിരുന്നു. പോലീസ് സ്ഥലത്തെത്തി നടത്തിയ ചോദ്യം ചെയ്യലിലാണ് പ്രതികൾ കുറ്റം സമ്മതിച്ചത്. നങ്ങ്യാർകുളങ്ങര സ്വദേശികളായ പ്രവീൺ, അരുൺ, മനോജ് എന്നിവരാണ് അറസ്റ്റിലായത്.
