ബാംബോലിം: ഗുജറാത്തിനെ എതിരില്ലാത്ത മൂന്ന് ഗോളിന് തകര്ത്തുകൊണ്ട് സന്തോഷ് ട്രോഫി ഫുട്ബോളില് കേരളത്തിന്റെ ഉജ്ജ്വല തുടക്കം. ആദ്യ പകുതിയില് തന്നെ മൂന്ന് ഗോളുകളും നേടി കേരളം വിജയം ഉറപ്പാക്കി.
അക്ബര് സിദ്ദീഖിന്റെ ഇരട്ടഗോളും നായകന് നിജോ ഗില്ബര്ട്ടിന്റെ ഗോളും കേരളത്തിന് തുണയായി. സതീവന് ബാലന് പരിശീലിപ്പിക്കുന്ന കേരള ടീം ഗ്രൂപ്പ് എയിലെ ആദ്യ മത്സരത്തില് ഗുജറാത്തിനെതിരെ വ്യക്തമായ ആധിപത്യത്തോടെയാണ് പൊരുതിയത്. 12-ാം മിനിറ്റില് അക്ബറിലൂടെ ആദ്യ ഗോള് നേടി. 33-ാം മിനിറ്റില് ഇരട്ടഗോള് തികച്ച് അക്ബര് കേരള ലീഡ് ഇരട്ടിപ്പിച്ചു. രണ്ട് മിനിറ്റ് കൂടി കഴിഞ്ഞപ്പോള് കേരള നായകന്റെ വക മൂന്നാം ഗോളും ഗുജറാത്ത് വലയില് കയറി.
ഗുജറാത്തിനെ നിഷ്പ്രഭമാക്കിയ മത്സരത്തിന്റെ രണ്ടാം പകുതിയില് കേരളത്തിന് ഒരു ഗോള് പോലും നേടാന് സാധിച്ചില്ല. അടുത്ത മത്സരം നാളെ ജമ്മുകശ്മീരിനെതിരെയാണ്. ചത്തീസ്ഗഢ്, ഗോവ എന്നിവരാണ് ഗ്രൂപ്പിലെ മറ്റ് ടീമുകള്.
