ജോര്ദാന്: ഹമാസ് നടത്തിയ മിന്നലാക്രമണത്തിന് പിന്നാലെ ഗാസയിലേക്കുള്ള വ്യോമാക്രമണം കടുപ്പിച്ച് ഇസ്രായേല്. ഇരുവിഭാഗങ്ങളും തമ്മിലുള്ള ഏറ്റുമുട്ടലില് മരണം ആയിരം കടന്നതായാണ് റിപ്പോര്ട്ടുകള്.
2500 ലധികം പേര്ക്ക് പരിക്കേറ്റു. ഇസ്രായേലില് മാത്രം 600 പേരാണ് മരിച്ചത്. 44 സൈനികരും ഇതിലുള്പ്പെടുന്നു. ഗാസ മുനമ്പിലേക്കുള്ള ആക്രമണം ശക്തമാക്കുന്നതിന് മുന്നോടിയായി പ്രദേശത്തു നിന്നും ഒഴിഞ്ഞു പോകാന് ഇസ്രായേല് ജനങ്ങള്ക്ക് മുന്നറിയിപ്പ് നല്കി. ഗാസയിലെ ഏഴ് മേഖലകളില് നിന്നും ഒഴിഞ്ഞു പോകാനാണ് നിര്ദേശം. കടന്നു കയറി ആക്രമണം നടത്തിയ നാനൂറ് ഹമാസ് ഭീകരരെ വധിച്ചെന്ന് ഇസ്രായേല് അവകാശപ്പെട്ടു. ഹമാസിന്റെ ആയുധസംഭരണ കേന്ദ്രങ്ങളും അവര് സാമ്പത്തിക വിനിമയം നടത്തുന്ന ബാങ്കുകളും തകര്ത്തെന്നും ഇസ്രായേല് സൈന്യം പറയുന്നു. വ്യോമാക്രമണം കൂടുതല് ശക്തമാക്കി ഗാസയുടെ നിയന്ത്രണം പൂര്ണമായി പിടിച്ചെടുക്കാനാണ് ഇസ്രായേല് സൈന്യത്തിന്റെ നീക്കമെന്നാണ് സൂചന.
ഇതിന്റെ ഭാഗമായി ഗാസയിലേക്കുള്ള വൈദ്യുതി ഇസ്രായേല് വിച്ഛേദിച്ചു. കൂടാതെ പ്രദേശത്തേക്കുള്ള ഇന്ധനത്തിന്റേതുള്പ്പെടെയുള്ള ചരക്കുനീ
ക്കം പൂര്ണമായും തടയുമെന്നും ഇസ്രായേല് വ്യക്തമാക്കി.
ഹമാസിനെതിരെ ആക്രമണം ശക്തമാക്കുമെന്നും അവരുടെ ഒളിത്താവളങ്ങള് നാമാവശേഷമാക്കുമെന്നും ഇസ്രായേല് പ്രധാനമന്ത്രി ബെഞ്ചമിന് നെതന്യാഹു പറഞ്ഞു. ഇസ്രായേലിനും ഇവിടുത്തെ പൗരന്മാര്ക്കും ഹമാസ് നല്കിയ ദുരിതം നിറഞ്ഞ ദിവസങ്ങള്ക്ക് മറുപടി നല്കും. ദുഷ്കരമായ നാളുകളാണ് മുന്നിലുള്ളത്. അമേരിക്കന് പ്രസിഡന്റ് ജോ ബൈഡനുമായി സംസാരിച്ചു. അദ്ദേഹം പിന്തുണ അറിയിച്ചിട്ടുണ്ട്. ഈ യുദ്ധം തുടരാനുള്ള സ്വാതന്ത്ര്യം അവര് ഇസ്രായേലിന് വാഗ്ദാനം ചെയ്തിട്ടുള്ളതായും അദ്ദേഹം വ്യക്തമാക്കി.
പാലസ്തീനിലെയും ഇസ്രായേലിലെയും ഭാരത പൗരന്മാര്ക്ക് ഭാരതത്തിന്റെ എംബസി ജാഗ്രതാ നിര്ദേശം നല്കിയിട്ടുണ്ട്. നിലവിലെ പശ്ചാത്തലത്തില് ഫ്രാന്സിലെ സിനഗോഗുകള്ക്കും ജൂത സ്കൂളുകള്ക്കും സുരക്ഷ വര്ധിപ്പിച്ചതായി ഫ്രഞ്ച് പ്രധാനമന്ത്രി അറിയിച്ചു.
40 അംഗ തീര്ത്ഥാടക സംഘം ഇസ്രായേലില് കുടുങ്ങി
ഹമാസിന്റെ അപ്രതീക്ഷിത ആക്രമണത്തില് കേരളത്തില് നിന്നുള്ള 40 അംഗ തീര്ത്ഥാടക സംഘം ഇസ്രായേലില് കുടുങ്ങി. മൂന്നിന് കൊച്ചിയില് നിന്ന് ഈജിപ്തിലേക്കു പോയ സംഘമാണ് ഇവിടെ കുടുങ്ങിയിരിക്കുന്നത്. നിലവില് ബത്ലഹേമിലെ പാരഡൈസ് ഹോട്ടലിലാണ് ഇവര്.
ഇവര്ക്കു പുറമേ നിരവധി മലയാളികള് പ്രദേശത്ത് കുടുങ്ങിയതായാണ് വിവരം. മുംബൈയില് നിന്നു തീര്ത്ഥാടനത്തിനുപോയ സംഘത്തിലും മലയാളികള് ഉള്പ്പെടുന്നു. ഇവര് നിലവില് സുരക്ഷിതരാണെന്നും. ഭാരതത്തിന്റെ എംബസിയുടെ നിര്ദേശങ്ങള് പിന്തുടരുകയാണെന്നും റിപ്പോര്ട്ടുകള് വ്യക്തമാക്കുന്നു.
കണക്കുപ്രകാരം 18,000 ഭാരതീയര് ഇസ്രായേലിലുണ്ടെന്നാണ് വിവരം. ഇവരില് നല്ലൊരു പങ്കും മലയാളികളാണ്. ടെല് അവീവ്, ബെര്ഷെവ, റംല പ്രദേശങ്ങളിലാണ് ഭാരതീയര് കൂടുതലായുള്ളത്.
ജാഗ്രത തുടരണമെന്ന് ഇന്ത്യ
സംഘര്ഷം രൂക്ഷമായ സാഹചര്യത്തില് ജാഗ്രത തുടരണമെന്ന് പൗരന്മാര്ക്ക് ഇന്ത്യന് എംബസി നിര്ദേശം നല്കി. പ്രദേശിക ഭരണകൂടം നല്കുന്ന സുരക്ഷാ നിര്ദേശങ്ങള് പാലിക്കണമെന്നും അനാവശ്യ സഞ്ചാരം ഒഴിവാക്കണമെന്നും നിര്ദേശത്തില് പറയുന്നു.
