മാവേലിക്കര: മാവേലിക്കരക്ക് യാത്ര ചെയ്ത സ്‌കൂട്ടര്‍ യാത്രക്കാരന് തമിഴ്നാട്ടില്‍ ഹെല്‍മെറ്റില്ലാതെ യാത്ര ചെയ്തതായി കുറ്റംചുമത്തി പിഴ. അടുത്ത കാലത്തൊന്നും തമിഴ്നാട്ടില്‍ പോയിട്ടില്ലാത്ത തെക്കേക്കര കുറത്തികാട് മുല്ലശ്ശേരി രാമചന്ദ്രന്‍ തമിഴ്നാട്ടില്‍ ഗോവിന്ദപുരത്ത് കൂടി ഹെല്‍മെറ്റ് ധരിക്കാതെ വണ്ടിയോടിച്ചെന്ന് കാട്ടിയാണ് 500 രൂപ ചുമത്തിയിരിക്കുന്നത്. കഴിഞ്ഞ ദിവസം രാവിലെ കുറത്തികാട്ടു നിന്നും മാവേലിക്കര ജങ്ഷന്‍ വരെയും അവിടെ നിന്ന് തിരിച്ചു ഹെല്‍മറ്റ് ധരിക്കാതെയാണ് യാത്ര ചെയ്തതെന്ന് അദ്ദേഹം സമ്മതിക്കുന്നു.
നിയമം ലംഘിച്ചിട്ടുണ്ടെങ്കില്‍ അതിന്റെ പിഴ അടയ്‌ക്കാന്‍ ബാധ്യസ്ഥനാണെന്നും രാമചന്ദ്രന്‍ പറയുന്നു. തനിക്ക് ലഭിച്ച സന്ദേശത്തില്‍ മേല്‍വിലാസവും വണ്ടി നമ്പരും ഫോണ്‍ നമ്പരുമെല്ലാം തന്റേതുതന്നെയാണ് എന്നാല്‍ തമിഴ്നാട്ടിലെ ഗോവിന്ദപുരത്ത് വച്ച് താന്‍ കുറ്റം ചെയ്തു എന്നാണ് ലഭിച്ച വാട്സ്ആപ്പ് സന്ദേശം ലഭിച്ചിരിക്കുന്നത്. തമിഴ്നാട്ടില്‍ തന്റെ സ്‌കൂട്ടറില്‍ യാത്ര ചെയ്തിട്ടില്ലാത്തതിനാല്‍ മോട്ടോര്‍ വകുപ്പിന്റെ നോട്ടീസ് കണ്ട് അത്ഭുതപ്പെട്ടിരിക്കുകയാണ് രാമചന്ദ്രന്‍.
