തൃശൂര്‍: സി പി എം നിലപാട് സഹകരണ മേഖലയെ തകര്‍ക്കുന്നതാണെന്ന് ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍.കോണ്‍ഗ്രസും യുഡിഎഫും ഇതിന് കൂട്ടുനില്‍ക്കുകയാണെന്നും അദ്ദേഹം കുറ്റപ്പെടുത്തി.
എലിയെ പേടിച്ച് ഇല്ലം ചുടുകയെന്ന പറയുന്നപോലെയാണ് ഇപ്പോഴെന്നും ബി ജെ പി സംസ്ഥാന അധ്യക്ഷന്‍ കുറ്റപ്പെടുത്തി. മുഖ്യമന്ത്രി പിണറായി വിജയന്‍ സഹകരണ പ്രസ്ഥാനത്തിന്റെ കടയ്‌ക്കല്‍ കത്തി വയ്‌ക്കുകയാണ്.
പാര്‍ട്ടി പറഞ്ഞാല്‍ കേരള ബാങ്കിലെ പണം നല്‍കി കരുവന്നൂര്‍ ബാങ്കിനെ സഹായിക്കുമെന്ന ബാങ്ക് പ്രസിഡന്റ് ഗോപി കോട്ടമുറിക്കലിന്റെ പ്രസ്താവന സംബന്ധിച്ച് അദ്ദേഹത്തിന്റെ കുടുംബ സ്വത്തല്ല കേരള ബാങ്കിലെ പണമെന്നും കെ സുരേന്ദ്രന്‍ പറഞ്ഞു. സുരേഷ് ഗോപി ഒരു മണ്ഡലത്തിലേ മത്സരിക്കൂവെന്ന് കെ സുരേന്ദ്രന്‍ വ്യക്തമാക്കി. ഇഡി അന്വേഷണം സുരേഷ് ഗോപിക്ക് തൃശൂരില്‍ കളമൊരുക്കാനെന്ന സിപിഎം സംസ്ഥാന സെക്രട്ടറി എംവി ഗോവിന്ദന്റെ പ്രസ്തവാനയോട് പ്രതികരിക്കുകയായിരുന്നു അദ്ദേഹം.
ഇതിനിടെ കരുവന്നൂരില്‍ ബിജെപി തൃശൂര്‍ ജില്ല കമ്മിറ്റിയുടെ സഹകരണ സംരക്ഷണ പദയാത്ര ഇന്ന് നടക്കും. സുരേഷ് ഗോപിയാണ് ജാഥ നയിക്കുക. ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍ പദയാത്ര ഉദ്ഘാടനം ചെയ്യും. കരുവന്നൂര്‍ സഹകരണ ബാങ്കില്‍ നിന്നാരംഭിക്കുന്ന പദയാത്ര തൃശൂര്‍ കോര്‍പറേഷന് മുന്നില്‍ സമാപിക്കും.
പ്രതികരിക്കാൻ ഇവിടെ എഴുതുക: