തിരുവനന്തപുരം: ശശിധരന്‍ കര്‍ത്തയുടെ ഉടമസ്ഥതയിലുളള കരിമണല്‍ കമ്പനി സിഎംആര്‍എലിന്റെ ഫണ്ട് വിവാദത്തില്‍ പറയുന്ന ഡയറിയിലെ ‘പിവി’പിണറായി വിജയന്‍ തന്നെയാണെന്ന് പ്രതിപക്ഷ നേതാവ് വി.ഡി.സതീശന്‍. പി വി എന്ന ചുരുക്കെഴുത്ത് പിണറായിയുടേത് തന്നെയെന്ന് ഉദ്യോഗസ്ഥര്‍ തന്നെ വെളിപ്പെടുത്തിയിട്ടുണ്ടെന്നും സതീശന്‍ ചൂണ്ടിക്കാട്ടി.
ഡയറിയില്‍ യുഡിഎഫ് നേതാക്കളുടെയും ചുരുക്കപ്പേരുണ്ട്. ഉമ്മന്‍ ചാണ്ടിയെയും രമേശ് ചെന്നിത്തലയെയും സംഭാവന പിരിക്കാന്‍ പാര്‍ട്ടി ചുമതലപ്പെടുത്തിയതാണെന്ന് നേരത്തേ തന്നെ താന്‍ പറഞ്ഞിരുന്നു. അതില്‍ എന്താണ് തെറ്റെന്നും സതീശന്‍ ചോദിച്ചു.
മുഖ്യമന്ത്രി പറയുന്നത് കേട്ടാല്‍ അദ്ദേഹത്തിന് കരിമണല്‍ കമ്പനിയുമായി ഒരു ബന്ധവുമില്ലെന്ന് തോന്നിപ്പോകും. മകളുടെ പണമിടപാടിനെ കുറിച്ച് മുഖ്യമന്ത്രി വ്യക്തമായി മറുപടി ഇപ്പോഴും പറയുന്നില്ല. മാസപ്പടി വിവാദത്തില്‍ സമഗ്ര അന്വേഷണം ആവശ്യമുണ്ടെന്നും സതീശന്‍ ആവശ്യപ്പെട്ടു.
സിഎംആര്‍എല്ലിന്റെ സി എഫ് ഒയെ തനിക്കറിയില്ലെന്ന് മുഖ്യമന്ത്രി കഴിഞ്ഞ ദിവസം വാര്‍ത്താ സമ്മേളനത്തില്‍ പറഞ്ഞിരുന്നു.ഡയറിയിലുളള പി വി താനല്ലെന്നും പിവി എന്ന ചുരുക്കപ്പേരുള്ള എത്ര പേരുണ്ട് ഈ നാട്ടിലെന്നും മുഖ്യമന്ത്രി ചോദിച്ചിരുന്നു.
പ്രതികരിക്കാൻ ഇവിടെ എഴുതുക: