തിരുവനന്തപുരം : ചെങ്കല്‍ മഹേശ്വരം ശ്രീ ശിവപാര്‍വതി ക്ഷേത്രത്തിലെ പൊതുപരിപാടിയില്‍ പങ്കെടുക്കവെ ചാണ്ടി ഉമ്മന്റെയും തന്റെയും ചിത്രം മാത്രം അടര്‍ത്തിയെടുത്ത് ചാണ്ടി ഉമ്മന്റെ ആര്‍.എസ്.എസ് ബന്ധം എന്ന പേരില്‍ നടത്തുന്ന പ്രചാരണത്തിനെതിരെ ബി.ജെ.പി നേതാവും തിരുവനന്തപുരം നഗരസഭാ കൗണ്‍സിലറുമായ ജി.എസ് ആശാനാഥ്. വ്യാജപ്രചാരണങ്ങള്‍ കൊണ്ട് അടിച്ചമര്‍ത്താന്‍ നോക്കണ്ടെന്നും ഇതിലൊന്നും പേടിക്കുന്നയാളല്ല താനെന്നും ആശാനാഥ് സാമൂഹ്യമാധ്യമത്തില്‍ ഫേസ്ബുക്കില്‍ കുറിച്ചു
ഓരോ കവലകളിലും സ്ത്രീ സംരക്ഷണം പ്രസംഗിക്കുന്നവരും മതില്‍ കെട്ടിയവരുമാണ് ഇപ്പോള്‍ ഒരു പൊതുപരിപാടിയുടെ ചിത്രം എടുത്ത് വ്യാജപ്രചാരണം നടത്തുന്നതെന്ന് ആശാനാഥ് പറയുന്നു.
തിരുവനന്തപുരം ചെങ്കല്‍ മഹേശ്വരം ശ്രീ ശിവപാര്‍വതി ക്ഷേത്രത്തിലെ ദേവലോകം ആധാര ശിലാസ്ഥാപന കര്‍മ്മം എന്ന പൊതുപരിപാടിയില്‍ പങ്കെടുത്തതിന് സിപിഎം സൈബര്‍ പ്രവര്‍ത്തകര്‍ വളരെ മോശവും നീചവുമായി സാമൂഹിക മാധ്യമങ്ങളിലെ വിവിധ സിപിഎം പേജുകളിലും, വാട്‌സാപ്പ് ഗ്രൂപ്പുകളിലും ചാണ്ടി ഉമ്മനോടൊപ്പം ഉള്ള ഫോട്ടോ വച്ച് പ്രചരിപ്പിക്കുന്നത് മനസിലാക്കാനായി. അവഗണിക്കാം എന്നാണ് കരുതിയതെങ്കിലും പലരും കാര്യം എന്താണെന്ന് വ്യക്തമാക്കണം എന്ന് പറയുന്നതിനാലാണ് പോസ്റ്റിടുന്നതെന്നും ആശാനാഥ് പറയുന്നു.
കോണ്‍ഗ്രസ് പാര്‍ട്ടി നടത്തിയ പരിപാടിയിലല്ല പങ്കെടുത്തത്. ഒരു ജനപ്രതിനിധി എന്ന നിലയില്‍ ക്ഷേത്രം അധികൃതരുടെ ക്ഷണപ്രകാരമാണ് പങ്കെടുത്തത്. പൊതുപരിപാടിയാകുമ്പോള്‍ വിവിധ രാഷ്ട്രീയ പാര്‍ട്ടി- സാമൂഹിക നേതാക്കളും ജനപ്രതിനിധികളുമൊക്കെ പങ്കെടുക്കുമല്ലോയെന്നും ആശാനാഥ് ചൂണ്ടിക്കാട്ടുന്നു.ഈ പരിപാടിയില്‍ കോണ്‍ഗ്രസ് എം എല്‍ എമാരായ ചാണ്ടി ഉമ്മന്‍, വിന്‍സെന്റ്, സിപിഎം ജില്ലാ പഞ്ചായത്ത് അംഗം സൂര്യ എസ് പ്രേം, സിപിഎം ബ്ലോക്ക് പഞ്ചായത്ത് അംഗം ജോജിന്‍, ബിജെപി നേതാവ് ചെങ്കല്‍ രാജശേഖരന്‍ തുടങ്ങി നിരവധി പ്രാദേശിക നേതാക്കള്‍ ഉള്‍പ്പെടെ പങ്കെടുത്തിരുന്നു.
അതില്‍ നിന്നും ഒരു ഫോട്ടോ മാത്രം അടര്‍ത്തിയെടുത്ത് അപകീര്‍ത്തിപ്പെടുത്തുകയാണ് ഇപ്പോള്‍.പഴയ പോസ്റ്റുകള്‍ തെരഞ്ഞാല്‍ സിപിഎം എംഎല്‍എ യോടൊപ്പമുള്ള പൊതുപരിപാടികളും കാണാനാകും.അപ്പോഴും നിങ്ങള്‍ സിപിഎം ന് വോട്ട് മറിച്ചു നല്‍കിയെന്ന് പ്രചരിപ്പിക്കുമോയെന്ന് ആശാ നാഥ് ചോദിക്കുന്നു.
ഇത്തരം കുപ്രചരണങ്ങളിലൂടെ രാഷ്‌ട്രീയത്തില്‍ നിന്ന് താന്‍ ഭയന്നോടുമെന്ന് വ്യാമോഹിക്കണ്ട. ശക്തമായി മുന്നോട്ട് പോകുക തന്നെ ചെയ്യുമെന്നും ആശാനാഥ് കുറിക്കുന്നു. ഇത്തരം വ്യക്തിപരമായ അധിക്ഷേപങ്ങള്‍ അന്തം കമ്മികളുടെ സ്ഥിരം ശൈലിയാണ്. ഇത് അവര്‍ ഇനിയും തുടരുമെന്ന് അറിയാമെന്നും വ്യാജപ്രചാരണങ്ങള്‍ കൊണ്ട് അടിച്ചമര്‍ത്താന്‍ നോക്കണ്ടെന്നും ബി ജെ പി കൗണ്‍സിലര്‍ സമൂഹമാധ്യമത്തില്‍ കുറിച്ചു.
പ്രതികരിക്കാൻ ഇവിടെ എഴുതുക