കോഴിക്കോട്: എസ്ഐ മർദ്ദിച്ചെന്ന പരാതിയുമായി യുവതി. വാഹനത്തിന് സൈഡ് കൊടുക്കുന്നതിനെ ചൊല്ലിയുളള തർക്കത്തെ തുടർന്ന് നടക്കാവ് എസ്ഐ അടക്കമുള്ള സംഘമാണ് മർദ്ദിച്ചതെന്ന് യുവതി ആരോപിക്കുന്നു. നടക്കാവ് എസ്ഐ വിനോദും സഹോദരനുമാണ് മർദ്ദിച്ചത്. സംഭവത്തിൽ യുവതി കാക്കൂർ പോലീസിൽ പരാതി നൽകി.
ഇന്ന് പുലർച്ചെയോടെയാണ് സംഭവം. മൂന്ന് സ്ത്രീകളും നാല് കുട്ടികളുമുൾപ്പെടെ യാത്ര ചെയ്യുകയായിരുന്നു യുവതി. സംഘത്തിന് വാഹനത്തിന് സൈഡ് കൊടുക്കാത്തതിന്റെ പേരിൽ രണ്ട് യുവാക്കൾ തർക്കിച്ചു. തുടർന്ന് ഇവർ എസ്ഐ വിനോദിനെ സ്ഥലത്തേക്ക് വിളിച്ചുവരുത്തി. അസഭ്യം പറഞ്ഞ എസ്ഐ പിന്നീട് അതിക്രൂരമായി മർദ്ദിക്കുകയായിരുന്നെന്നാണ് യുവതിയുടെ ആരോപണം.
ഇവർ മദ്യലഹരിയിലായിരുന്നെന്നും യുവതി പറഞ്ഞു. യുവതി സഞ്ചരിച്ചിരുന്ന വാഹനവും തകർക്കാൻ ശ്രമിച്ചെന്നും പരാതിയിലുണ്ട്. കാക്കൂർ പോലീസിൽ യുവതി പരാതി നൽകി.
