തൃശൂര്: തൃശുർ നഗരത്തിൽ വൻ സ്വർണ കവർച്ച. കാറിലെത്തിയ സംഘം തൃശൂര് ടൗണിലെ ഡിപി പ്ലാസാ ബിള്ഡിംഗിലുള്ള ഡിപി ചെയിന്സ് എന്ന സ്ഥാപനത്തില് നിന്നാണ് സ്വര്ണം കവര്ച്ച ചെയ്തത്. വെള്ളിയാഴ്ച രാത്രി പതിനൊന്ന് മണിയോടെയാണ് സംഭവം. കന്യാകുമാരി, മാര്ത്തണ്ഡം ഭാഗത്തെ കടകളിലെത്തിക്കാനുള്ള സ്വര്ണവുമായി റെയില്വേ സ്റ്റേഷനിലേക്ക് ജീവനക്കാര് പോകുമ്പോഴായിരുന്നു കവര്ച്ചാ സംഘം എത്തിയത്.
റിന്റോ, പ്രസാദ് എന്നീ ജീവനക്കാര് സ്വര്ണം ബാഗിലാക്കി കടയില് നിന്നിറങ്ങിയയുടന് വെള്ള നിറമുള്ള സ്വിഫ്റ്റ് കാറിലെത്തി സ്വര്ണം തട്ടിയെടുക്കുകയായിരുന്നു. പണി കഴിപ്പിച്ച ആഭരണങ്ങൾ ആഴ്ചയിൽ ഒരു ദിവസം ചെന്നൈ – എഗ്മോർ ട്രെയിനിൽ പതിവായി കൊണ്ടുപോകാറുണ്ടായിരുന്നു. മോഷണം നടക്കണമെങ്കില് സ്ഥാപനത്തിലെ ആരുടെയെങ്കിലും സഹായം ലഭിച്ചിരിക്കാമെന്ന് പോലീസ് സംശയം പ്രകടിപ്പിച്ചു.
ഇവിടെയുള്ള എല്ലാ ജീവനക്കാരുടേയും ഫോണ് ട്രാക്ക് ചെയ്യുന്നുണ്ട്. സിസിടിവി ദൃശ്യങ്ങളും പരിശോധിച്ച് വരികയാണെന്ന് പോലീസ് വ്യക്തമാക്കി.
