ചെന്നൈ: സനാതന ധർമ്മത്തിന്റെ മൂല്യം കുട്ടികൾക്ക് പകരാനായി പുത്തൻ പദ്ധതിയുമായി തിരുമല തിരുപ്പതി ദേവസ്വം. തിരഞ്ഞെടുക്കപ്പെടുന്ന വിദ്യാർത്ഥികൾക്ക് ഭഗവദ്ഗീത വിതരണം ചെയ്യാനാണ് ദേവസ്വത്തിന്റെ തീരുമാനം. തിരുമല തിരുപ്പതി ദേവസ്വം ബോർഡ് ചെയർമാൻ ഭൂമന കരുണാകർ റെഡ്ഡിയാണ് ഇക്കാര്യം അറിയിച്ചത്.
സനാതന ധർമ്മം പ്രോത്സാഹിപ്പിക്കുന്നതിന്റെ ഭാഗമായി തിരുപ്പതിയിൽ 600 കോടി രൂപയുടെ തീർത്ഥാടന കേന്ദ്രങ്ങൾ നിർമ്മിക്കാനും തീരുമാനമായി. 20,000 തീർത്ഥാടകരെ ഉൾക്കൊള്ളാൻ സാധിക്കുന്ന തരത്തിലാണ് തീർത്ഥാടന കേന്ദ്രങ്ങൾ നിർമ്മിക്കാൻ പദ്ധതിയിടുന്നത്.
തമിഴ്നാട് മന്ത്രി ഉദയനിധി സ്റ്റാലിന്റെ സനാതന ധർമ്മത്തിനെതിരായുള്ള പരമാർശത്തിൽ പ്രതിഷേധം കത്തുന്നതിനിടെയാണ് തിരുപ്പതി ദേവസ്വത്തിന്റെ സുപ്രധാന തീരുമാനമെന്നത് ശ്രദ്ധേയമാണ്. സനാതന ധർമ്മത്തെ കൂടുതൽ ശക്തമാക്കാനുള്ള പ്രവർത്തനങ്ങൾക്ക് നേതൃത്വം നൽകാനാണ് ബോർഡിന്റെ തീരുമാനം.
