എറണാകുളം: ആലുവയിൽ വീണ്ടും കുട്ടിയെ തട്ടിക്കൊണ്ടു പോയി പീഡനം. ഇതരസംസ്ഥാന തൊഴിലാളികളായ മാതാപിതാക്കൾക്കൊപ്പം കിടന്നുറങ്ങിയ പെൺകുട്ടിയെയാണ് തട്ടിക്കൊണ്ടുപോയി പീഡിപ്പിച്ചത്. ആലുവ ചാത്തൻ പുറത്ത് ഇന്ന് പുലർച്ചെ രണ്ട് മണിയോടെയാണ് നാടിനെ നടുക്കിയ സംഭവം. മാതാപിതാതക്കൾക്കൊപ്പം കിടന്നുറങ്ങിയ പെൺകുട്ടിയെ കാണാതായതിനെ തുടർന്ന് പ്രദേശവാസികളുടെ നേതൃത്വത്തിൽ നടത്തിയ തിരച്ചിലിനൊടുവിലാണ് കുട്ടിയെ കണ്ടെത്തുന്നത്.
പാടത്ത് നിന്നും വിവസ്ത്രയായ നിലയിലാണ് കുട്ടിയെ കണ്ടെത്തിയത്. ആരാണ് കുട്ടിയെ തട്ടിക്കൊണ്ട് പോയതെന്ന് കണ്ടെത്താനായിട്ടില്ല. പ്രദേശത്തെ കുറിച്ച് കൃത്യമായ ധാരണയുള്ള ആളാണ് പിന്നിലെന്നാണ് പോലീസ് നിഗമനം. രാത്രിയിൽ ശക്തമായ മഴ പെയ്ത സമയത്തായിരുന്നു സംഭവം.
അതേസമയം പെൺകുട്ടിയെ തട്ടിക്കൊണ്ട് പോയ സംഭവത്തിൽ പ്രതികരണവുമായി ദൃക്സാക്ഷി സുകുമാരൻ. രാത്രി രണ്ട് മണിയോടെ വീടിന്റെ ജനലിലൂടെ ശബ്ദം കേട്ട് നോക്കിയപ്പോളാണ് പെൺകുട്ടിയുമായി ഒരാൾ കടന്നു കളയുന്നത് കണ്ടതെന്ന് അദ്ദേഹം പറഞ്ഞു. തുടർന്ന് നാട്ടുകാരെ വിവരം അറിയിച്ച് പ്രദേശത്ത് തിരച്ചിൽ നടത്തുകയായിരുന്നു. പെൺകുട്ടിയെ കണ്ടെത്തി വീട്ടിലെത്തിച്ച ശേഷം പോലീസിൽ വിവരം അറിയിക്കുകയായിരുന്നുവെന്ന് സുകുമാരൻ പറഞ്ഞു.
