ഗുരുവായൂര്‍: ബ്രദേഴ്സ് ക്ലബ്ബ് തിരുവെങ്കിടത്തിന്റെ ആഭിമുഖ്യത്തില്‍ ആഗസ്റ്റ് 30, 31 ഓണ ദിനങ്ങളില്‍, പ്രദേശം ഒന്നായി അണിചേര്‍ന്ന് രൂപീകരിച്ച തട്ടകം ഓണാഘോഷ കമ്മിറ്റിയുടെ നേതൃത്വത്തില്‍ തിരുവെങ്കിടാചലപതി ക്ഷേത്ര മൈതാനിയില്‍ നടത്തുന്ന ഓണാഘോഷത്തിന് ഒരുക്കങ്ങളായതായി ഭാരവാഹികള്‍ അറിയിച്ചു.
30 ന് കാലത്ത് തിരുവെങ്കിടം ക്ഷേത്ര മൈതാനിയുടെ പരിസരത്ത് വാദ്യ പ്രതിഭകളുടെ കേളികൊട്ടിന്റെ അകമ്പടിയില്‍ ആഘോഷത്തിന് കൊടിയേറും. തുടര്‍ന്ന് കായിക, കലാ, വിനോദ മത്സരങ്ങള്‍ക്ക് തുടക്കംകുറിക്കും. വൈക്കീട്ട് 4 ന് സെ. ആന്റണീസ് പള്ളി പരിസരത്ത് നിന്ന് പ്രദേശത്തിന്റെ മേള, കലാ പെരുമ വിളിച്ചോതി നിശ്ചല വേഷങ്ങളുമായി വിളംമ്പര ഘോഷയാത്ര ആരംഭിച്ച്, പ്രദേശം ചുറ്റി തിരുവെങ്കിടാചലപതി ക്ഷേത്രപരിസരത്ത് എത്തിച്ചേരും. 31 ന് കലാപരിപാടികള്‍, മെഗാ തിരുവാതിര, വിഭവസമൃദ്ധമായ ഓണസദ്യ, സാംസ്‌കാരിക സദസ്, വൈക്കീട്ട് 6 മണിക്ക് മെഗാസ്റ്റേജ് ഷോയും ഉണ്ടാകും. ഓണാഘോഷത്തിന് ആവേശം പകര്‍ന്ന് ഇരുദിനങ്ങളിലുമായി മാരത്തോണ്‍, വടംവലി എന്നിവയോടൊപ്പം പൂക്കളമത്സരം, കിടപ്പ് രോഗികള്‍ക്ക് ഓണക്കോടി വിതരണം തുടങ്ങിയവയും സംഘടിപ്പിച്ചിട്ടുണ്ടെന്ന് തട്ടകം ഓണാഘോഷ കമ്മിറ്റി ഭാരവാഹികളായ ചന്ദ്രന്‍ ചങ്കത്ത്, വിനോദ്കുമാര്‍ അകമ്പടി, രവികുമാര്‍ കാഞ്ഞുള്ളി, ജിഷോ പുത്തൂര്‍, ബിന്ദു കൂടത്തിങ്കല്‍, ബാലചന്ദ്രിക അകമ്പടി, മുരളി പൈക്കാട്ട്, ബാലന്‍ വാറണാട്ട് എന്നിവര്‍ അറിയിച്ചു.
