വിവാഹവാഗ്ദാനം നൽകി ഡോക്ടർക്ക് പീഡനം; പോലീസ് നടപടി ഉണ്ടാകുന്നില്ലെന്ന് ആക്ഷേപം

തിരുവനന്തപുരം: വിവാഹ വാഗ്ദാനം നൽകി സഹപാഠിയെ ഡോക്ടർ പീഡിപ്പിച്ചെന്ന പരാതിയിൽ കേസെടുത്തിട്ടും പോലീസ് തുടർനടപടികൾ സ്വീകരിക്കുന്നില്ലെന്ന് പരാതി. പെൺകുട്ടി മജിസ്‌ട്രേറ്റിന് മുന്നിൽ രഹസ്യമൊഴി സഹിതം നൽകിയിട്ടും അറസ്റ്റിലേക്ക് നീങ്ങുന്നില്ലെന്നു ആക്ഷേപം. പത്തനംതിട്ട സ്വദേശി ഡോ. അരുൺബാബുനെതിരെയാണ് യുവ ഡോക്ടറുടെ പരാതി.
2021 നവംബർ 25ന് ടെക്‌നോപാർക്കിന് സമീപമുള്ള അപ്പാർട്ട്‌മെന്റിൽ വച്ചാണ് പീഡനം നടന്നത്. ഇരുവരും ഒരേ മെഡിക്കൽകോളജിൽ പിജി ചെയ്യവേ ആണ് അരുൺബാബു വിവാഹ വാഗ്ദാനം നൽകുന്നത്. പിജി കഴിഞ്ഞാലുടൻ വിവാഹം എന്നായിരുന്നു വാഗ്ദാനമെന്നും വീട്ടുകാരെ പരിചയപ്പെടുത്താനെന്ന വ്യാജേന അപ്പാർട്ട്‌മെന്റിൽ എത്തിച്ച് ഭീഷണിപ്പെടുത്തിയും ബലംപ്രയോഗിച്ചും പീഡിപ്പിക്കുകയായിരുന്നുവെന്ന് പരാതിയിൽ പറയുന്നു. 2023 മെയ് മാസത്തിൽ പിജി കഴിഞ്ഞതോടെ വിവാഹം കഴിക്കണമെന്ന് ആവശ്യപ്പെട്ടപ്പോൾ ഡോ. അരുൺബാബു ഒഴിഞ്ഞുമാറി.
തുടർന്ന് ഡോ. അരുൺബാബുവിന്റെ വീട്ടുകാരുമായി സംസാരിച്ചെങ്കിലും അരുൺ വിവാഹത്തിന് തയ്യാറായില്ല. തുടർന്നാണ് പേട്ട പോലീസിൽ പരാതി നൽകിയത്. എഫ്‌ഐആർ ഇട്ട് പെൺകുട്ടിയുടെ മൊഴി രേഖപ്പെടുത്തിയിട്ട് മാസങ്ങൾ കഴിഞ്ഞിട്ടും അരുൺകുമാറിന്റെ കുടുംബത്തിന് ഭരണകക്ഷിയുമായുള്ള ബന്ധം കാരണം പോലീസ് തുടർനടപടികൾ സ്വീകരിച്ചില്ലെന്ന് പെൺകുട്ടി പറയുന്നു. പേട്ട പോലീസിനെതിരെ ഡിജിപിക്കും വനിതാകമ്മീഷനും പരാതി നൽകാനൊരുങ്ങുകയാണ് യുവതി.