തൃശൂര്‍: കഴിഞ്ഞ വര്‍ഷത്തെ കാര്‍ഷിക പുരസ്‌കാരങ്ങള്‍ കൃഷി മന്ത്രി, പി. പ്രസാദ് പ്രഖ്യാപിച്ചു. കേരള കാര്‍ഷിക സര്‍വ്വകലാശാല, പട്ടാമ്പി പ്രാദേശിക കാര്‍ഷിക ഗവേഷണ കേന്ദ്രത്തിലെ അസോ. പ്രൊഫസറായ ഡോ. വി. തുളസിക്ക് ആണ് മികച്ച കാര്‍ഷിക ഗവേഷകക്കുള്ള സംസ്ഥാന അവാര്‍ഡ് ലഭിച്ചത്. 2006 മുതല്‍ കൃഷി ഓഫീസര്‍ ആയും തുടര്‍ന്ന് 2008 മുതല്‍ കാര്‍ഷിക ശാസ്ത്രജ്ഞയുമാണ് ഡോ. തുളസി.
കേരളത്തിലെ കൃഷിയിടങ്ങളിലുള്ള സൂക്ഷ്മമൂലകങ്ങളുടെ അഭാവം തിരിച്ചറിഞ്ഞ് ശാസ്ത്രീയ പരിഹാരം എന്ന നിലയ്‌ക്ക് പ്രധാന വിളകളായ നെല്ല്, വാഴ, പച്ചക്കറികള്‍ എന്നിവയില്‍ ഉപയോഗിക്കാനും വിളവ് വര്‍ധിപ്പിക്കാനും സാധിക്കുന്ന സൂക്ഷ്മമൂലക മിശ്രിതങ്ങളായ സമ്പൂര്‍ണ കെ.എ.യു. മിക്‌സ് വികസിപ്പിച്ചെടുത്തതാണ് ഡോ. തുളസിയുടെ പ്രധാന നേട്ടം. രാസ, ജൈവ വളങ്ങള്‍ തനിയെ ഉപയോഗിക്കുന്നതിനേക്കാള്‍ മെച്ചപ്പെട്ടതാണ് സംയോജിത ഉപയോഗ രീതി എന്ന് തെളിയിക്കുന്നതില്‍ അവര്‍ പ്രധാന പങ്കു വഹിച്ചിട്ടുണ്ട്. കേരളത്തിലെ വിവിധ പ്രദേശങ്ങളിലെ മണ്ണിന്റെ ഗുണനിലവാര സൂചിക വിലയിരുത്തിയുള്ള പഠനത്തിലും പങ്കാളിയാണ്. പാലക്കാട് ജില്ലയിലെ ശ്രീകൃഷ്ണപുരം ബ്‌ളോക്ക് നോഡല്‍ ഓഫീസര്‍ കൂടിയാണ് ഡോ. തുളസി.
ബിഎസ്‌സി അഗ്രിക്കള്‍ച്ചര്‍ ഒന്നാം റാങ്ക് ജേതാവായിരുന്ന ഡോ. തുളസി ഐഎആര്‍ഐ മെറിറ്റ് മെഡല്‍, ഹരിതക്ഷോണി ജ്വാല അവാര്‍ഡ്, ഡോ. സതീഷ് മെമോറിയല്‍ യുവ ശാസ്ത്രജ്ഞ അവാര്‍ഡ് തുടങ്ങിയ പുരസ്‌കാര ജേതാവ് കൂടിയാണ്. പാലക്കാട് ചെര്‍ര്‍പ്പുളശ്ശേരി സ്വദേശിയായ തുളസി 2010 മുതല്‍ പട്ടാമ്പിയിലെ പ്രാദേശിക കാര്‍ഷിക ഗവേഷണ കേന്ദ്രത്തില്‍ സേവനമനുഷ്ഠിക്കുന്നു. അതുല്‍ ലിമിറ്റഡില്‍ ഏരിയാ സെയില്‍സ് മനോജര്‍ രാജേഷ് പൂടിക്കളമാണ് ഭര്‍ത്താവ്. മക്കള്‍ ഭദ്ര, ദേവ.
പ്രതികരിക്കാൻ ഇവിടെ എഴുതുക: