പഴയന്നൂര്‍: എളനാട് ഫോറസ്റ്റ് സ്റ്റേഷന്‍ പരിധിയിലെ കല്ലേപ്പാടത്തു നിന്നും കാട്ടുപന്നിയിറച്ചി പിടികൂടിയ കേസില്‍ ഇറച്ചി കടത്താന്‍ ഉപയോഗിച്ച ഓട്ടോറിക്ഷ പിടികൂടി. ഒന്നാം പ്രതി സൈമണിന് കാട്ടുപന്നിയിറച്ചി വില്‍പനക്കായി കൂട്ടുപ്രതികളായ നൗഷാദ്, സുധീഷ് എന്നിവര്‍ ഉപയോഗിച്ച ആപ്പേ ഓട്ടോറിക്ഷയാണ് പാതിരിപ്പാല പെരുമ്പറമ്പ് ഭാഗത്തുള്ള മഠത്തിന്‍പടിക്കല്‍ സുരേന്ദ്രന്‍ എന്നയാളുടെ വീട്ടുവളപ്പില്‍ നിന്നും അന്വേഷണ സംഘം കണ്ടെത്തിയത്.
പ്രതികളായ പാതിരിപ്പാല പെരുമ്പറമ്പ്ഭാഗത്ത് നൗഷാദ്, സുധീഷ് എന്നിവര്‍ക്കു വേണ്ടിയുള്ള അന്വേഷണം വനംവകുപ്പ് ഊര്‍ജിതമാക്കി. മച്ചാട് റേഞ്ച് ഫോറസ്റ്റ് ഓഫീസര്‍ ശ്രീദേവി മധുസൂദനന്റെ നേതൃത്വത്തിലാണ് അന്വേഷണം. എളനാട് ഫോറസ്റ്റ് സ്റ്റേഷന്‍ ഡെ. റേഞ്ച് ഫോറസ്റ്റ് ഓഫീസര്‍ എസ്. എന്‍. രാജേഷിന്റെ നേതൃത്വത്തില്‍ സെക്ഷന്‍ ഫോറസ്റ്റ് ഓഫീസര്‍മാരായ വൈ.എം. സുധീര്‍. എം. കെ. സനില്‍, ബീറ്റ് ഫോറസ്റ്റ് ഓഫീസര്‍മാരായ എന്‍. പി. ബൈജു, എം. ഗ്രീഷ്മ, ഗായത്രി പ്രവീണ്‍ എന്നിവരാണ് അന്വേഷണ സംഘത്തില്‍ ഉണ്ടായിരുന്നത്.
