വലപ്പാട്: സാമൂഹ്യ, സാംസ്കാരിക രംഗത്തെ പരിവര്ത്തന പ്രവര്ത്തനങ്ങള്ക്ക് നേതൃത്വം നല്കുന്നവര്ക്കായി വലപ്പാട് ബീച്ച് കാളിയമ്മക്കാവ് വിഷ്ണുമായ ക്ഷേത്രം ട്രസ്റ്റ് ഏര്പ്പെടുത്തിയ ‘കാളീപ്രിയ’ പുരസ്കാരം ഏറാട്ട് ഗിരീഷിന് സമര്പ്പിക്കുമെന്ന് ട്രസ്റ്റിമാരായ കുണ്ടായില് ദിലീപ് ശാന്തി, ജിഷ്ണു ദിലീപ് എന്നിവര് അറിയിച്ചു. ആഗസ്റ്റ് 12 ന് കാളിയമ്മക്കാവ് ക്ഷേത്രാങ്കണത്തില് നടക്കുന്ന ചടങ്ങില് പുരസ്കാരം സമര്പ്പിക്കും.
പഴുവില് സ്വദേശിയായ തെക്കിനിയേടത്ത് ഉദയഭാനുവിന്റെ മരണാനന്തര കര്മങ്ങളെല്ലാം നിര്വ്വഹിച്ചത് ഭാര്യ ലിയയാണെന്നും ഭര്ത്താവിന്റെ അന്ത്യകര്മങ്ങള് ഭാര്യ ചെയ്യുന്നത് പരമ്പരാഗത കീഴ്വഴക്കങ്ങളെ മറികടക്കുന്നതാണെന്നും അതിന് സഹായകരമായ നിലപാടെടുത്ത് മറ്റൊരു സാമൂഹ്യപരിഷ്കരണത്തിന് നേതൃത്വം നല്കുകയാണ് ഗിരീഷ് ചെയ്തതെന്ന് പുരസ്കാര നിര്ണയ സമിതി വിലയിരുത്തിയതായും ട്രസ്റ്റ് അംഗങ്ങള് പറഞ്ഞു.
രാമായണ പ്രചാരണത്തിന് കഴിഞ്ഞ 20 ഇരുപത് വര്ഷമായി ചെയ്തുവരുന്ന പ്രവര്ത്തനങ്ങളും സേതുബന്ധനവുമായി ബന്ധപ്പെട്ട ഏക ചടങ്ങിന്റെ പുനരുജ്ജീവന പ്രവര്ത്തനങ്ങളും പുരസ്കാരത്തിന് പരിഗണിച്ചു. ചെമ്മാപ്പിള്ളി ഏറാട്ട് പ്രഭാകരന്, ശാരദ ദമ്പതികളുടെ മകനായ ഗിരീഷ് തൃശൂര് കെഎസ്ആര്ടിസി ഡിപ്പോയില് കണ്ടക്ടറാണ്. ഏറാട്ട് ശ്രീമൂലസ്ഥാനം ഭഗവതി ക്ഷേത്രത്തിലെ എഴുത്തിനിരുത്ത് ആചാര്യന് കൂടിയായ ഗിരീഷ് നിരവധി സാംസ്കാരിക പ്രവര്ത്തനങ്ങള്ക്ക് നേതൃത്വം നല്കിയിട്ടുണ്ട്.
