കൊച്ചി: ഗുജറാത്തില്‍ മദ്യ നിരോധനം നിലനില്‍ക്കുമ്പോള്‍ ലക്ഷദ്വീപില്‍ മദ്യ ലഭ്യത ഉറപ്പാക്കാന്‍ ശ്രമിക്കുന്നതെന്തിനെന്ന് ലക്ഷദ്വീപ് സ്വദേശിനിയായ സംവിധായിക ഐഷ സുല്‍ത്താന. കേന്ദ്ര ഭരണ പ്രദേശത്തേക്കുള്ള എക്‌സൈസ് റെഗുലേഷന്‍ കരട് ബില്ലില്‍ കേന്ദ്ര സര്‍ക്കാര്‍ പൊതുജനങ്ങളുടെ അഭിപ്രായം തേടിയ പശ്ചാത്തലത്തിലാണ് ഫേസ്ബുക്ക് പോസ്റ്റിലൂടെയാണ് പ്രതികരണം. മഹാത്മ ഗാന്ധിയുടെ ജന്മസ്ഥലമെന്ന പശ്ചാത്തലത്തില്‍ ഗുജറാത്തില്‍ ഏര്‍പ്പെടുത്തിയിരിക്കുന്ന മദ്യനിരോധനവും ടൂറിസം കേന്ദ്രമായ ലക്ഷദ്വീപില്‍ മതനിയമത്തിന്റെ പേരിലുള്ള മദ്യനിരോധനവും തമ്മില്‍ താരതമ്യം ചെയ്യുന്ന വിഡ്ഢിത്തരത്തിനെതിരേ നിരവധി പേര്‍ മറുപടിയുമായി രംഗത്തെത്തി.
പോസ്റ്റിന്റെ പൂര്‍ണരൂപം-
ലക്ഷദ്വീപിൽ മദ്യം ലഭ്യമാക്കണോ? എന്നതിനെ പറ്റി ജനങ്ങളോട് അഭിപ്രായം തേടിയിരിക്കയാണ് സർക്കാർ:ലക്ഷദ്വീപിലേക്ക് മദ്യം “ആവശ്യമില്ല” എന്ന് തന്നെയാണ് ജനങളുടെ അഭിപ്രായം, മദ്യം പൂർണ്ണ നിരോധനമുള്ള സ്ഥലമാണ് “ഗുജറാത്ത്” അല്ലെ അതേ പോലെ മദ്യം പൂർണ്ണ നിരോധനമുള്ള മറ്റൊരു സ്ഥലമാണ് “ലക്ഷദ്വീപ്”
ഗുജറാത്തിൽ നടപ്പാക്കാതിരിക്കുന്ന മദ്യവില്പന ലക്ഷദ്വീപിൽ നടപ്പാക്കാൻ ശ്രമിക്കുന്നതിന്റെ കാരണം എന്താണ്? ഇതാണോ ലക്ഷദ്വീപിന്റെ വികസനം?ലക്ഷദ്വീപിലെ ജനങ്ങൾക്ക് ആവശ്യം മദ്യമല്ല, പകരം കുടിവെള്ളമാണ്… നാട്ടുകാർക്ക് ആവശ്യമായ
ഭക്ഷണസാധനങ്ങളാണ്, ജനങളുടെ ചികിത്സയിക്ക് വേണ്ടിയുള്ള എല്ലാ സൗകര്യങ്ങളോടു കൂടിയ മെഡിക്കൽ കോളേജാണ്, ഡോക്ടർമ്മാരെയാണ്, മരുന്നുകളാണ്, വിദ്യാർത്ഥികൾക്ക് കോളേജും സ്കൂളുകളിലേക്ക് ടീച്ചർമ്മാരെയുമാണ്, മഴ പെയ്താൽ നാട് ഇരുട്ടിലാവാതിരിക്കാനുള്ള കറണ്ടുകളാണ്, മത്സ്യ ബന്ധന തൊഴിലാളിമാർക്കുള്ള പെട്രോളും മണ്ണണ്ണയും ഐസ് പ്ലാണ്ടുകളുമാണ്, ജനങ്ങൾക്ക് യാത്ര സൗകര്യം കൂട്ടികൊണ്ടുള്ള കപ്പലുകളാണ്, ഇന്നോടികൊണ്ടിരിക്കുന്ന കപ്പലുകൾക്ക് എഞ്ചിൻ ഓഫ്‌ ചെയ്യാനുള്ള സമയം പോലും കിട്ടാത്ത അവസ്ഥയാണ്, ഇക്കണക്കിന്‌ പോയാൽ 20 വർഷം ഓടേണ്ട കപ്പൽ 10 വർഷമാകുമ്പോഴേക്കും കേടാകും, ഒന്നിനും കൊള്ളാത്ത അവസ്ഥയാവും അല്ലെ? കൊണ്ട് വരേണ്ടതും മാറ്റം വരുത്തേണ്ടതും ഇതിലൊക്കെയാണ്…ഇതൊക്കെയാണ് ഞങ്ങൾ ജനങളുടെ ആവശ്യം…ഇതിൽ ഏതെങ്കിലും ഒരെണ്ണമെങ്കിലും നടപ്പാക്കി തരാമോ?
2021ല്‍ ലക്ഷദ്വീപ് അഡ്മിനിസ്‌ട്രേറ്റര്‍ പ്രഫുല്‍ പട്ടേലിനെ ജൈവായുധം എന്ന് വിശേഷിപ്പിച്ചതിന് കവരത്തി പോലീസ് ഐഷയ്‌ക്കെതിരേ രാജ്യദ്രോഹക്കുറ്റം ചുമത്തിയിരുന്നു. ചാനല്‍ ചര്‍ച്ചയ്‌ക്കിടെയായിരുന്നു പരാമര്‍ശം. ദ്വീപില്‍ കൊവിഡ്-19 പടരാനിടയാക്കിയ പരിഷ്‌കരണങ്ങള്‍ കൊണ്ടുവന്ന ആള്‍ എന്ന നിലയിലാണ് ജൈവായുധം എന്ന് വിശേഷിപ്പിച്ചതെന്നായിരുന്നു ഐഷയുടെ വിശദീകരണം.
പ്രതികരിക്കാൻ ഇവിടെ എഴുതുക: