തുമ്പമണ് : പത്തനംതിട്ട ജില്ലാ മൗണ്ടന് സൈക്ലിങ് ചാമ്പ്യന്ഷിപ്പിൽ അണ്ടര് 14 ആണ്കുട്ടികളില് മോഷോ എം വര്ഗീസ്, പെണ്കുട്ടികളില് ആഷ്ലി സുനു എന്നിവര് ഒന്നാം സ്ഥാനം കരസ്ഥമാക്കി. അണ്ടര് 16 കാറ്റഗറിയില് ആണ്കുട്ടികളുടെ വിഭാഗത്തില് അദ്വൈത് പെണ്കുട്ടികളുടെ വിഭാഗത്തില് മിസ്രിയ എന്നിവര് വിജയികളായി.
എന് എസ് കെ ഫൗണ്ടേഷന് സ്കൂളില് നടന്ന ചാമ്പ്യന്ഷിപ്പില് ദേശീയ താരങ്ങൾ ഉൾപ്പടെ നൂറില്പരം മത്സരാര്ത്ഥികള് പങ്കെടുത്തു. അണ്ടര് 18 ആണ്കുട്ടികളുടെ മത്സരത്തില് ഓഷോ എം വര്ഗീസ്, സീനിയര് ആണ്കുട്ടികളുടെ മത്സരത്തില് പ്രിയനന്ദന് എന്നിവര് ഒന്നാം സ്ഥാനം കരസ്ഥമാക്കി സംസ്ഥാനതല മത്സരത്തിലേക് യോഗ്യത നേടി. 130 പോയിന്റ്റുകള് കരസ്ഥമാക്കി ഇളമണ്ണൂര് ജയ്ഹിന്ദ് മാര്ഷല് ആര്ട്സ് ആന്ഡ് സ്പോര്ട്സ് സ്കൂള് ഏവര്റോളിങ് നേടി. 65 പോയിന്റുമായി ശാലോം പബ്ലിക് സ്കൂള് ചെന്നിര്ക്കര സെക്കന്റ് റണ്ണര് അപ്പ് ആയി, 55 പോയിന്റുമായി എന് എസ് കെ ഇന്റര്നാഷണല് സ്കൂള് മൂന്നാം സ്ഥാനം കരസ്ഥമാക്കി.
ജില്ലാ സ്പോര്ട്സ് കൗണ്സില് പ്രസിഡന്റ് കെ അനില്കുമാര് ചാമ്പ്യൻഷിപ്പ് ഉദ്ഘാടനം ചെയ്തു. ജില്ലാ സൈക്ലിങ് അസോസിയേഷന് പ്രസിഡന്റ് തോമസ് മാത്യു ആദ്ധ്യക്ഷത വഹിച്ചു. തുമ്പമണ് ഗ്രാമപഞ്ചായത്ത് പ്രസിഡന്റ് റോണി സക്കറിയ, ജില്ലാ ഒളിമ്പിക് അസോസിയേഷന് സെക്രട്ടറി ആര്. പ്രസന്നകുമാര്, എന് എസ് കെ സ്കൂള് പ്രിന്സിപ്പല് സ്മിത നെടിയപറമ്പ്, ഗ്രാമപഞ്ചായത്ത് മെമ്പര് പവിത്രന്, സംസ്ഥാന സൈക്ലിങ് അസോസിയേഷന് എക്സിക്യൂട്ടീവ് മെമ്പര് എന്. ചന്ദ്രന്, ജില്ലാ സെക്രട്ടറി രേവതി എസ്സ് നായര് തുടങ്ങിയവര് ചടങ്ങില് പ്രസംഗിച്ചു.
പ്രതികരിക്കാൻ ഇവിടെ എഴുതുക: