വാരണാസി: ഗ്യാന്വാപി പള്ളി സമുച്ചയത്തില് ആര്ക്കിയോളജിക്കല് സര്വേ ഓഫ് ഇന്ത്യയുടെ (എഎസ്ഐ) കീഴില് സര്വേ നടത്താന് വാരണാസി കോടതി അനുമതി നല്കി. പുരാവസ്തു വകുപ്പിനു കീഴില് മുഴുവന് ഗ്യാന്വാപി പള്ളി പരിസരവും ശാസ്ത്രീയ സര്വേ നടത്താന് നിര്ദേശം നല്കണമെന്ന് ആവശ്യപ്പെട്ട് ഹിന്ദു വിഭാഗം നല്കിയ ഹര്ജിയിലാണ് കോടതി ഉത്തരവ്.
സീല് ചെയ്ത പള്ളിക്കുളം ഒഴികെയുള്ള ഭാഗത്താണ് പരിശോധന നടക്കുകയെന്ന് കേസില് ഹിന്ദു പക്ഷത്തെ പ്രതിനിധീകരിക്കുന്ന വിഷ്ണു ശങ്കര് ജെയിന് പറഞ്ഞു. സീല് ചെയ്ത ടാങ്ക് ഒഴികെ ഗ്യാന്വാപി പള്ളി സമുച്ചയത്തില് എഎസ്ഐ സര്വേ നടത്താന് വാരണാസി കോടതി നിര്ദ്ദേശം നല്കിയതായി കേസില് ഹിന്ദു പക്ഷത്തെ പ്രതിനിധീകരിക്കുന്ന വിഷ്ണു ശങ്കര് ജെയിന് പറഞ്ഞു. 36 മാസത്തിനുള്ളില് സര്വേ പൂര്ത്തിയാക്കാന് കഴിയുമെന്ന് കരുതെന്നും അദ്ദേഹം പറഞ്ഞു.
കോടതി വിധി കേസില് വഴിത്തിരിവാണെന്ന് ഗ്യാന്വാപി കേസില് ഹിന്ദു പക്ഷത്തെ പ്രതിനിധീകരിക്കുന്ന സുഭാഷ് നന്ദന് ചതുര്വേദി പറഞ്ഞു. വിശ്വനാഥ ക്ഷേത്രത്തില് സ്ഥിതി ചെയ്യുന്ന ഗ്യാന്വാപി മസ്ജിദിന്റെ മുഴുവന് സമുച്ചയത്തെയും കുറിച്ച് എഎസ്ഐ പഠനം നടത്തണമെന്നാവശ്യപ്പെട്ട് ഹിന്ദു വിഭാഗം വാരണാസി കോടതിയില് ഹര്ജി നല്കിയിരുന്നു. കഴിഞ്ഞ വെള്ളിയാഴ്ചയാണ് ഹര്ജിയില് കോടതി വാദം പൂര്ത്തിയാക്കിയത്.
അതിനിടെ ഗ്യാന്വാപി പള്ളിയിലെ കുളത്തില് കിടക്കുന്ന വസ്തു ശിവലിംഗമാണെന്ന ഹിന്ദു വിഭാഗത്തിന്റെ വാദം അംഗീകരിച്ച് ആ വസ്തുവിന്റെ കാര്ബണ് ഡേറ്റിംഗ് നടത്താന് അലഹബാദ് കോടതി വിധിച്ചിരുന്നു. ഈ വിധി തല്ക്കാലത്തേക്ക് സുപ്രീംകോടതി തടഞ്ഞിരിക്കുകയാണ്.
ഇതും വലിയ സാമൂഹ്യപ്രശ്നങ്ങളുണ്ടാക്കാന് സാധ്യതയുള്ള പ്രശ്നമാണ്. വാരണാസിയിലെ ഗ്യാന്വാപി പള്ളിയില് കണ്ടെത്തിയ ശിവലിംഗമെന്ന് ഹിന്ദുവിഭാഗം വിളിക്കുന്ന വസ്തുവിന്റെ കാലപ്പഴക്കവും നിജസ്ഥിതിയും മനസ്സിലാക്കാനാണ് കാര്ബണ് ഡേറ്റിംഗ് ഉള്പ്പെടെയുള്ള ശാസ്ത്രീയ പരിശോധനയ്ക്ക് വിധേയമാക്കുന്നത്.
എന്നാല് മുസ്ലിം വിഭാഗം ഇതിനെ ഒന്നടങ്കം എതിര്ക്കുകയാണ്. ശിവലിംഗമാണെന്ന് ഹിന്ദു വിശ്വാസികളും പള്ളിയുടെ ഉള്ളിലെ വെള്ളം നിര്ത്താന് കെട്ടിയെ കുളത്തിലെ ജലധാരയാണ് അതെന്ന് പള്ളി അധികൃതരും അവകാശപ്പെടുന്ന വസ്തുവിനെ ശാസ്ത്രീയ പരിശോധനയ്ക്ക് വിധേയമാക്കേണ്ട ആവശ്യമില്ലെന്ന നിലപാടിലാണ് മുസ്ലിം സമുദായം.
അടുത്ത ഒരു തീയതി വരെ അലഹബാദ് ഹൈക്കോടതിയുടെ ഉത്തരവ് തല്ക്കാലത്തേക്ക് തടഞ്ഞതായി സുപ്രീംകോടതി ബെഞ്ച് പറഞ്ഞു. ചീഫ് ജസ്റ്റിസ് ചന്ദ്രചൂഡും നരസിംഹയും അംഗങ്ങളായ ബെഞ്ചാണ് ഉത്തരവ് തടഞ്ഞത്. ഇക്കാര്യത്തില് ഉത്തര്പ്രദേശ് സര്ക്കാരിനോടും കേന്ദ്രസര്ക്കാരിനോടും സുപ്രീംകോടതി വിശദീകരണം തേടിയിട്ടുണ്ട്. അതേ സമയം, കാര്ബണ് ഡേറ്റിംഗ് നടത്തിയതുകൊണ്ട് ആ വസ്തുവിന് കേടുപാടുകള് സംഭവിക്കില്ലെന്ന് സോളിസിറ്റര് ജനറല് തുഷാര് മേത്ത വാദിച്ചു.
നേരത്തെ, ഗ്യാന്വാപി പള്ളി അധികൃതര് ഇത് ശിവലിംഗമാണെന്ന വാദത്തെ തള്ളിക്കളയുന്നു. സുപ്രീംകോടതി വിധി പ്രകാരം ശിവലിംഗം കണ്ടെത്തിയ ഗ്യാന്വാപി പള്ളിയ്ക്കുള്ളിലെ പ്രദേശം പൊലീസ് സംരക്ഷണയിലാണ് ശിവലിംഗത്തിന്റെ സംരക്ഷണം നീട്ടണമെന്ന ഹിന്ദു സംഘടനകളുടെ ഹര്ജിയിലായിരുന്നു നേരത്തെ സുപ്രീംകോടതിയുടെ ഈ ഉത്തരവ്.
വാരണാസിയിലെ കാശി വിശ്വനാഥക്ഷേത്ര-ഗ്യാന്വാപി പള്ളി തര്ക്കം: കേസിന്റെ ചരിത്രം
2022 ഏപ്രിലിലാണ് യുപിയിലെ ഗ്യാന്വാപിശൃംഗാര് ഗൗരി തര്ക്കം വാര്ത്തകളില് നിറഞ്ഞത്. ഗ്യാന്വാപി പള്ളിയിലെ പുറംചുമരിനോട് ചേര്ന്ന് ഹിന്ദുവിഗ്രഹങ്ങള് ഉണ്ടെന്നും അതിനെ ആരാധിക്കാന് അനുവദിക്കണമെന്നും ആവശ്യപ്പെട്ട് ആറ് ഹിന്ദു സ്ത്രീകള് കോടതിയെ സമീപിച്ചതോടെയാണ് തര്ക്കം ആരംഭിക്കുന്നത്.. ഇതോടെ ഗ്യാന്വാപി പള്ളിസമുച്ചയത്തിന്റെ വീഡിയോ സര്വ്വേ നടത്താന് വാരണസി ജില്ലാ കോടതി ഉത്തരവിട്ടു.
ഈ സര്വ്വേ നടത്തുന്നതിനിടയിലാണ് പള്ളിക്കുളത്തില് ശിവലിംഗത്തിനോട് സാമ്യമുള്ള വസ്തു കണ്ടെത്തിയത്. ഇത് ശിവലിംഗമാണെന്ന് ഒരു വിഭാഗം വാദിക്കുമ്പോള് ഇത് ശിവലിംഗമല്ല, വിശ്വാസികള് നമാസിന് ഉപയോഗിക്കുന്ന കുളത്തിലെ ജലധാരയുടെ ഭാഗമാണെന്നായിരുന്നു മറുപക്ഷത്തിന്റെ വാദം.
