തിരുവനന്തപുരം: ഹൈക്കോടതി ഉത്തരവിന്റെ അടിസ്ഥാനത്തില് പിവി അന്വര് എംഎല്എയുടെ അനധികൃത ഭൂമി ഉടന് തിരിച്ചുപിടിക്കാന് സംസ്ഥാന സര്ക്കാര് തയ്യാറാവണമെന്ന് ബിജെപി സംസ്ഥാന അദ്ധ്യക്ഷന് കെ.സുരേന്ദ്രന്. നടപടി പൂര്ത്തിയാക്കാന് സമയം വേണമെന്ന സര്ക്കാരിന്റെ വാദം അപഹാസ്യമാണെന്നും അദ്ദേഹം പ്രസ്താവനയില് പറഞ്ഞു.
സര്ക്കാര് തലത്തില് അന്വറിന് വേണ്ടി വഴിവിട്ട സഹായം ലഭിച്ചുവെന്ന് വ്യക്തമാണ്. മാഫിയകളെയും കൊള്ളക്കാരെയും സഹായിക്കുന്ന സര്ക്കാരാണ് കേരളം ഭരിക്കുന്നത്. സിപിഎമ്മുകാര് ഏറെ കൊട്ടിഘോഷിക്കുന്ന ഭൂപരിഷ്ക്കരണ നിയമം ലംഘിച്ചാണ് അവരുടെ തന്നെ നേതാവ് മിച്ച ഭൂമി കൈവശംവച്ചിരിക്കുന്നത്. കമ്മ്യൂണിസ്റ്റ് പാര്ട്ടിയുടെ അപചയം വ്യക്തമാക്കുന്നതാണ് ഇത്തരം സംഭവങ്ങളെന്നും സുരേന്ദ്രന് പറഞ്ഞു.
അന്വറിനെതിരെ നടപടികളുമായി മുന്നോട്ട് പോയ ലാന്ഡ് അക്വിസിഷന് ഡെപ്യൂട്ടി കളക്ടര് എന്കെ എബ്രഹാമിനെ സ്ഥലം മാറ്റിയത് സര്ക്കാര് ആര്ക്കൊപ്പമാണെന്ന് കൃത്യമായി തെളിയിക്കുന്നുണ്ട്. മടിയില് കനമുള്ളത് കൊണ്ടാണ് പിവി അന്വര് മാദ്ധ്യമങ്ങളെ ഭയപ്പെടുന്നത്. സത്യം പുറത്തെത്തുമെന്ന പേടികൊണ്ടാണ് അദ്ദേഹം മാദ്ധ്യമപ്രവര്ത്തകരെ ഭീഷണിപ്പെടുത്തുന്നത്.
ഇത് കമ്മ്യൂണിസ്റ്റ് രാജ്യമല്ല, ഇന്ത്യയാണെന്ന് അന്വറും സംഘവും മനസിലാക്കണം. സംസ്ഥാന സര്ക്കാരിന് തുടര്ച്ചയായി ഹൈക്കോടതിയില് തിരിച്ചടിയേല്ക്കുകയാണ്. കോട്ടയം തിരുവാര്പ്പ് സംഭവത്തിലെ പൊലീസിന്റെ അലംഭാവം കോടതി ചൂണ്ടിക്കാണിച്ചത് ആഭ്യന്തരവകുപ്പിന് മുഖത്തേറ്റ പ്രഹരമാണ്. പത്തനംതിട്ടയിലെ മഗംളം ലേഖകന് വിശാഖന്റെ ഫോണ് പിടിച്ചെടുത്ത സംഭവത്തിലും കേരള പൊലീസ് കോടതിയില് നാണംകെട്ടുവെന്നും കെ.സുരേന്ദ്രന് പറഞ്ഞു.
