കോട്ടയം: സംസ്ഥാനത്ത് മഴ ശമിച്ചിട്ടും കെടുതികള് തുടരുന്ന പശ്ചാത്തലത്തില് മൂന്ന് ജില്ലകളിലെ നിശ്ചിത പ്രദേശങ്ങളിലുളള വിദ്യാഭ്യാസ സ്ഥാപനങ്ങള്ക്ക് തിങ്കളാഴ്ച അവധി പ്രഖ്യാപിച്ചു. കോട്ടയം, ആലപ്പുഴ, പത്തനംതിട്ട ജില്ലകളിലെ നിശ്ചിത പ്രദേശങ്ങളിലാണ് അവധി.
കോട്ടയം താലൂക്കിലെ പ്രൊഫഷണല് കോളേജുകള്, അങ്കണവാടി ഉള്പ്പെടെയുള്ള വിദ്യാഭ്യാസ സ്ഥാപനങ്ങള്ക്കും ചങ്ങനാശേരി, വൈക്കം താലൂക്കുകളിലെ ദുരിതാശ്വാസക്യാമ്പുകള് പ്രവര്ത്തിക്കുന്ന സ്കൂളുകള്ക്കും തിങ്കളാഴ്ച അവധി പ്രഖ്യാപിച്ചു.പത്തനംതിട്ട ജില്ലയില് ദുരിതാശ്വാസ ക്യാമ്പുകള് പ്രവര്ത്തിക്കുന്ന സ്കൂളുകള്ക്കാണ് ജില്ലാ കളക്ടര് അവധി പ്രഖ്യാപിച്ചിരിക്കുന്നത്. എന്നാല്, നേരത്തേ നിശ്ചയിച്ച സര്വകലാശാല പരീക്ഷകള്ക്കും പൊതു പരീക്ഷകള്ക്കും അവധി ബാധകമല്ല.
ആലപ്പുഴയില് വെള്ളക്കെട്ട് രൂക്ഷമായ കുട്ടനാട് താലൂക്കിലെ വിദ്യാഭ്യാസ സ്ഥാപനങ്ങള്ക്ക് തിങ്കളാഴ്ച അവധി പ്രഖ്യാപിച്ചു. താലൂക്കിലെ പ്രൊഫഷണല് കോളേജുകള്ക്കും അംഗന്വാടികള്ക്കും ട്യൂഷന് സെന്ററുകള്ക്കും അവധി ബാധകമാണ്. ജില്ലയില് ദുരിതാശ്വാസ ക്യാമ്പുകള് പ്രവര്ത്തിക്കുന്ന വിദ്യാഭ്യാസ സ്ഥാപനങ്ങള്ക്കും അവധിയായിരിക്കും. എന്നാല് മുന് നിശ്ചയിച്ച പരീക്ഷകള്ക്ക് മാറ്റുമുണ്ടായിരിക്കില്ല.
