കാഞ്ഞാണി: വിദ്യാര്ത്ഥികളെയും യുവാക്കളെയും ലക്ഷ്യമിട്ട് വില്പനക്കെത്തിച്ച എംഡിഎംഎ യുമായി രണ്ടു യുവാക്കളെ അന്തിക്കാട് പോലീസ് പിടികൂടി. ആമ്പല്ലൂര് മണ്ണംപേട്ട സ്വദേശികളായ മഠത്തിപ്പറമ്പില് ശ്രീകാന്ത് (25), കൊടിയഴികത്ത് അനുലാല് (25) എന്നിവരെയാണ് ഇരിങ്ങാലക്കുട ഡി.വൈ.എസ്.പി. ടി.കെ. ഷൈജു, അന്തിക്കാട് ഇന്സ്പെക്ടര് പി.കെ. ദാസ് എന്നിവര് ചേര്ന്ന് അറസ്റ്റ് ചെയ്തത്. കച്ചവടത്തിനായി എത്തിച്ച 8.63 ഗ്രാം എംഡിഎംഎ യുമായിട്ടാണ് ഇവരെ പോലീസ് അറസ്റ്റ് ചെയ്തത്. പഴുവില് ശ്രീഗോകുലം കോളേജിന് മുന്വശത്തുള്ള റോഡില് മാങ്ങാട്ടുപാടത്തു വച്ചാണ് പോലീസ് ഇവരെ എംഡിഎംഎ യുമായി പിടികൂടുന്നത്.
വിദ്യാര്ത്ഥികള്ക്കും യുവാക്കള്ക്കും ഇടയില് വില്പന നടത്താനാണ് മയക്കുമരുന്ന് എത്തിച്ചെതെന്ന് പ്രതികള് ചോദ്യം ചെയ്യലില് പോലീസിനോട് സമ്മതിച്ചു. ഇവര്ക്ക് മയക്കുമരുന്ന് ലഭിച്ചതിന്റെ ഉറവിടവും, വില്പന നടത്തിയവയെയും കുറിച്ച് പോലീസ് ഊര്ജിതമായ അന്വേഷണം ആരംഭിച്ചിട്ടുണ്ട്.
എസ്ഐ മാരായ സി. ഐശ്വര്യ, ബെനഡിക്ട്, എഎസ്ഐ മാരായ സുബാഷ്, ഷാബു, പോലീസ് ഉദ്യോഗസ്ഥരായ സുര്ജിത്ത്, വിഷ്ണു എന്നിവരും പ്രതികളെ പിടികൂടിയ സംഘത്തില് ഉണ്ടായിരുന്നു.
