പാലക്കാട്: കേന്ദ്രസര്ക്കാരിന്റെ നിര്ദ്ദേശപ്രകാരമുള്ള ഐക്യരാഷ്ട്ര സംഘടനയുടെ ആഹ്വാനപ്രകാരമുള്ള മില്ലറ്റ് വര്ഷത്തില് അട്ടപ്പാടിയിലെ ചെറുധാന്യ സംസ്കരണ കേന്ദ്രം ഒരുവര്ഷത്തിനിടെ ഏഴായിരം കിലോ സംഭരിച്ച് നേട്ടമുണ്ടാക്കി. പുതൂര് പഞ്ചായത്തിലെ ചീരക്കടവിലാണ് സംസ്കരണ കേന്ദ്രം പ്രവര്ത്തിക്കുന്നത്.
റാഗി, ചാമ, തിന, പനി വരഗ്, കമ്പ്, മണി ചോളം, കുതിരവാലി തുടങ്ങിയ ചെറുധാന്യങ്ങളാണ് പ്രധാനമായും കൃഷി ചെയ്യുന്നത്. അതില് റാഗിയും ചാമയുമാണ് ഏറ്റവുമധികം ഉത്പാദിപ്പിക്കുന്നത്.റാഗിയെ പൊടിയും മറ്റുള്ളവ അരിയുമാക്കിയാണ് മാറ്റുന്നത്.
150ലധികം വരുന്ന ചെറുധാന്യ കര്ഷകര് സംസ്ക്കരണ കേന്ദ്രം ഉപയോഗപ്പെടുത്തുന്നുണ്ട്. കര്ഷകരുടെ ഉത്പന്നങ്ങള് കൃഷി വകുപ്പ് സംഭരിച്ച് സംസ്കരണ കേന്ദ്രത്തിലൂടെ ഉത്പന്നങ്ങളാക്കി മാറ്റുകയാണ് ചെയ്യുന്നത്. മാത്രമല്ല ഇവര്ക്ക് നേരിട്ട് സംസ്കരണശാലയിലെത്തി ഉത്പന്നങ്ങള് സംസ്കരിക്കാനുള്ള സൗകര്യവുമുണ്ട്.
റീബില്ഡ് കേരള അട്ടപ്പാടി ആദിവാസി സമഗ്ര വികസന പദ്ധതിയുടെ പേരിലാണ് നിലവില് ഉത്പന്നങ്ങള് വില്ക്കുന്നത്. ഫാര്മര് പ്രൊഡ്യുസേഴ്സ് ഓര്ഗനൈസേഷന്റെ 9645298860 എന്ന നമ്പറില് ബന്ധപ്പെട്ട് ഉത്പന്നങ്ങള് വാങ്ങാം.
ആദ്യ ഘട്ടത്തില് ജൈവ സര്ട്ടിഫിക്കേഷന് ലഭിക്കാത്ത അട്ടപ്പാടിയിലെ 310 മില്ലറ്റ് കര്ഷര്ക്കുള്ള ജൈവ സര്ട്ടിഫിക്കേഷന് പ്രവര്ത്തനങ്ങള് അവസാന ഘട്ടത്തിലാണ്. പരിശോധന പൂര്ത്തിയായതായി കൃഷിവകുപ്പ് അസി. ഡയറക്ടര് ആര്. ലത പറഞ്ഞു.
1236 ചെറുധാന്യ കര്ഷകരില് 926 പേര്ക്കാണ് ആദ്യഘട്ടത്തില് ജൈവ സര്ട്ടിഫിക്കേഷന് ലഭിച്ചത്. സര്ട്ടിഫിക്കേഷന് ലഭിക്കുന്നതോടെ കര്ഷകരുടെ ഉത്പ്പന്നങ്ങള് ജൈവ ലേബലില് വിദേശത്തേക്കുള്പ്പെടെ കയറ്റുമതി ചെയ്യാം.
