പാലക്കാട്: മാലിന്യം കുമിഞ്ഞുകൂടി പാലക്കാട് കെഎസ്ആര്ടിസി ഗാരേജ്. നടപടിയെടുക്കാതെ അധികൃതര്. എലിപ്പനി പോലെയുള്ള പകര്ച്ചവ്യാധികള് ജില്ലയില് റിപ്പോര്ട്ട് ചെയ്തിരിക്കെ നൂറുകണക്കിന് എലികളുടെ ആവാസകേന്ദ്രമായി മാറിയിരിക്കുകയാണ് ഗാരേജ്. മാലിന്യം നീക്കം ചെയ്യാന് അധികൃതര് നടപടിയെടുക്കാത്തതില് ജീവനക്കാര് പ്രതിഷേധത്തില്
നിരവധി ജീവനക്കാര്ക്ക് എലിയുടെ കടിയേല്ക്കുകയും, ബാഗുകളും, ഭക്ഷണസാധനങ്ങളും നശിപ്പിക്കുകയുമുണ്ടായി. മാത്രമല്ല, പുതിയ ബസുകളുടെ ലക്ഷക്കണക്കിന് രൂപ വരുന്ന വയറിങുകളും എയര് ഹോസുകളും കടിച്ചു മുറിക്കുകയും ചെയ്തിട്ടുണ്ട്. അധികൃതര്ക്ക് പലതവണ രേഖാമൂലം പരാതി നല്കിയിട്ടും നടപടിയെടുക്കുന്നില്ലെന്ന് ജീവനക്കാര് ആരോപിച്ചു.
ഉടന് തന്നെ ഗാരേജിലെ മാലിന്യം നീക്കംചെയ്ത് ജീവനക്കാര്ക്ക് സുരക്ഷഉറപ്പുവരുത്തണമെന്നാവശ്യപ്പെട്ട് കെഎസ്ടി എംപ്ലോയീസ് സംഘിന്റെ നേതൃത്വത്തില് ഡിപ്പോയില് പ്രതിഷധം സംഘടിപ്പിച്ചു. സംസ്ഥാന സെക്രട്ടറി പി.കെ.ബൈജു ഉദ്ഘാടനം ചെയ്തു.
യൂണിറ്റ് വൈസ് പ്രസിഡന്റ് ഇ.ശശി അധ്യഷത വഹിച്ചു. ജില്ലാ സെക്രട്ടറി ടി.വി. രമേഷ് കുമാര്, യൂണിറ്റ് സെക്രട്ടറി എം.മുരുകേശന് സംസാരിച്ചു. യൂണിറ്റ് ഭാരവാഹികളായ ആര്.ശിവകുമാര്,നാഗനന്ദകുമാര്, എ.വിനോദ്,സി.കെ.സുകുമാരന്,ശബരിഗിരീശന് എന്നിവര് പ്രതിഷേധത്തിന് നേതൃത്വം നല്കി.
