തിരുവനന്തപുരം: ഉജ്ജയിന്, ഹരിദ്വാര്, ഋഷികേശ്, കാശി, അയോദ്ധ്യ, അലഹബാദ് തുടങ്ങിയ തീര്ത്ഥാടന കേന്ദ്രങ്ങള് സന്ദര്ശിക്കുവാന് കേരളത്തില്നിന്നും പ്രത്യേക ടൂറിസ്റ്റ് ട്രെയിന്. ഭാരതത്തിലെ പുരാണങ്ങളിലും, ഉപനിഷത്തുകളിലും പ്രതിപാദിച്ചിരിക്കുന്ന പുണ്യസ്ഥലങ്ങളും, ചരിത്രവും പൗരാണികതയും സമ്മേളിക്കുന്ന തീര്ത്ഥാടന കേന്ദങ്ങളും സന്ദര്ശിക്കുവാന് അവസരവുമായി ഭാരത സര്ക്കാര് പൊതുമേഖലാ സ്ഥാപനമായ ഇന്ത്യന് റെയില്വേ കാറ്ററിംഗ് ആന്ഡ് ടൂറിസം കോര്പറേഷന് ലിമിറ്റഡ് (ഐ.ആര്.സി.ടി.സി) ഭാരത് ഗൗരവ് ട്രെയിന് ടൂര് പാക്കേജ് അവതരിപ്പിക്കുന്നു.
ഭാരത സര്ക്കാരിന്റെ ‘ദേഖോ അപ്നാ ദേശ്’, ‘ഏക് ഭാരത് ശ്രേഷ്ഠ ഭാരത്’ എന്നീ ആശയങ്ങള് പ്രോത്സാഹിപ്പിക്കുന്നതിനായി ഇന്ത്യന് റെയില്വേ ഭാരത് ഗൗരവ് ടൂറിസ്റ്റ് ട്രെയിനുകള് ഓടിച്ചുവരുന്നു. ഈ വിഭാഗത്തിലെ അടുത്ത ട്രെയിന് യാത്ര 2023 ജൂലൈ 20-ന് കേരളത്തില്നിന്നും യാത്രതിരിച്ച് ”ഉജ്ജയിന്, ഹരിദ്വാര്, ഋഷികേശ്, കാശി, അയോദ്ധ്യ, അലഹബാദ്’ എന്നിവിടങ്ങള് സന്ദര്ശിച്ച് ജൂലൈ 31-ന് തിരികെ വരുന്നു.
ജ്യോതിര്ലിംഗങ്ങളിലെ ഏക സ്വയംഭൂലിംഗമായ ദ്വാദശജ്യോതിര്ലിംഗങ്ങളില്പ്പെടുന്ന മദ്ധ്യപ്രദേശിലെ ഉജ്ജയിനിയില് രുദ്രസാഗര് തടാകകരയില് സ്ഥിതി ചെയ്യുന്ന ശ്രീ മഹാകാലേശ്വര് ക്ഷേത്രം, നര്മദ നദിയില് ശിവപുരി എന്ന ദ്വീപില് സ്ഥിതിചെയ്യുന്ന ജ്യോതിര്ലിംഗക്ഷേത്രങ്ങളിലൊന്നായ ഓംകാരേശ്വര് ക്ഷേത്രം എന്നിവയും. ഉത്തരാഖണ്ഡ് സംസ്ഥാനത്തില് ഗംഗാ നദിയുടെ തീരത്ത് സ്ഥിതി ചെയ്യുന്ന ദൈവത്തിലേക്കുള്ള വഴി എന്ന അര്ത്ഥം വരുന്ന പുണ്യ നഗരമായ ഹരിദ്വാറും അവിടെ ഗംഗ നദിയിലെ ആരതിയും, ഹിമാലയത്തിലേക്കുള്ള പ്രവേശനകവാടം എന്നറിയപ്പെടുന്ന ഹിന്ദുക്കളുടെ പുണ്യനഗരമായ ഋഷികേശിലെ ക്ഷേത്രങ്ങളും അവിടത്തെ പ്രധാന ടൂറിസ്റ്റ് ആകര്ഷണമായ രാം ഝൂലയും. ലോകത്തിലെ ഏറ്റവും പഴയ നഗരങ്ങളില് ഒന്നായി കണക്കാക്കപ്പെടുന്ന ഹിന്ദുക്കളുടെയും, ബുദ്ധമതക്കാരുടേയും, ജൈനമതക്കാരുടേയും പുണ്യ നഗരമായ ഉത്തര് പ്രദേശ് സംസ്ഥാനത്ത് സ്ഥിതിചെയ്യുന്ന കാശിയിലെ (വാരാണസി) തീര്ത്ഥാടന കേന്ദ്രങ്ങളായ കാശി വിശ്വനാഥ ക്ഷേത്രം, വിശാലാക്ഷി ക്ഷേത്രം, കാല ഭൈരവ ക്ഷേത്രം, പ്രശസ്തമായ കാശിയിലെ ഗംഗ ആരതി, ശ്രീബുദ്ധന് ആദ്യമായി ധര്മപ്രഭാഷണം നടത്തിയ ഗംഗ-ഗോമതി നദികളുടെ സംഗമസ്ഥാനത്ത് സ്ഥിതി ചെയ്യുന്ന ബുദ്ധമതസ്തരുടെയും ജൈനമതസ്തരുടെയും തീര്ത്ഥാടന കേന്ദ്രവും അശോക സ്തംഭം ഉള്പ്പെടെ നിരവധി പ്രത്യേക കാഴ്ചകള് സമ്മാനിക്കുന്നതുമായ സാരാനാഥ് എന്നിവയും. പുരാതന ഇന്ത്യയിലെ മഹാജനപദങ്ങളിലൊന്നായ കോസല രാജ്യത്തിന്റെ തലസ്ഥാനമായിരുന്ന അയോദ്ധ്യയിലെ രാമക്ഷേത്രവും മറ്റു ക്ഷേത്രങ്ങളും, അവിടെ പുണ്യനദിയായ സരയു നദിയും. ഗംഗ-യമുന-സരസ്വതി എന്നീ പുണ്യ നദികളുടെ സംഗമകേന്ദ്രമായ പ്രയാഗ്രാജിലെ (അലഹബാദ്) ത്രിവേണി സംഗമം തുടങ്ങി വേദ കാലഘട്ടം മുതല് ഇങ്ങോട്ടുള്ള ചരിത്രം പേറുന്ന നിരവധി തീര്ത്ഥാടന കേന്ദ്രങ്ങളും പൈതൃക കേന്ദ്രങ്ങളും ഈ യാത്രയിലൂടെ സന്ദര്ശിക്കാവുന്നതാണ്.
സ്ലീപ്പര് ക്ലാസും, 3 ടയര് എസി സൗകര്യവുമുള്ള അത്യാധുനികമായ എല്.എച്ച്.ബി ട്രെയിനില് ഇന്ത്യയിലെ പ്രധാന വിനോദസഞ്ചാര കേന്ദ്രങ്ങള് സന്ദര്ശിക്കാന് റെയില്വേ സഞ്ചാരികളെ സ്വാഗതം ചെയ്യുന്നു. യാത്രക്കാരുടെ സുരക്ഷക്കായി എല്ലാ കോച്ചുകളിലും സുരക്ഷാ ജീവനക്കാരുടെ സേവനവും അത്യാധുനികമായ സിസിടിവി ക്യാമറകളും സജ്ജീകരിച്ചിട്ടുണ്ട്. ഒരു തീര്ത്ഥാടന യാത്ര എന്നതിലുപരി ഭാരതത്തിന്റെ സമ്പന്നമായ പൈതൃകം പേറുന്ന കേന്ദ്രങ്ങള് സന്ദര്ശിക്കുന്നതിനാല് ചരിത്ര കുതുകികളായ ടൂറിസ്റ്റുകള്ക്കും ഈ യാത്ര ഉപകാരപ്രദമാണ്.
* എസി 3 ടയര്, സ്ലീപ്പര് ക്ലാസ് എന്നിവ ചേര്ന്ന് ആകെ 754 വിനോദസഞ്ചാരികളെ ഉള്ക്കൊള്ളാന് ശേഷിയുള്ളതാണ് ഭാരത് ഗൗരവ് ടൂറിസ്റ്റ് ട്രെയിന്.
* വിനോദസഞ്ചാരികള്ക്ക് കൊച്ചുവേളി, കൊല്ലം, കോട്ടയം, എറണാകുളം ടൗണ്, തൃശൂര്, ഒറ്റപ്പാലം, പാലക്കാട് ജംഗ്ഷന്, പോടന്നൂര് ജംഗ്ഷന്, ഈറോഡ് ജംഗ്ഷന്, സേലം എന്നിവിടങ്ങളില് നിന്ന് ട്രെയിന് കയറാവുന്നതാണ്.
ട്രെയിന് യാത്ര, രാത്രി താമസം, യാത്രയ്ക്കുള്ള വാഹനം എന്നിവ ഇനിപ്പറയുന്ന രീതിയില് നല്കുന്നതാണ്.
* ബുക്കിംഗ് സമയത്ത് തിരഞ്ഞെടുത്ത ക്ലാസ് അനുസരിച്ച് സ്ലീപ്പര് ക്ലാസിലോ 3 എസിയിലോ ട്രെയിന് യാത്ര, എ.സി അല്ലെങ്കില് നോണ് എ.സി വാഹനങ്ങളില് യാത്ര.
* രാത്രി താമസത്തിനായി എസി ഹോട്ടലുകളില് താമസം.
* വെജിറ്റേറിയന് ഭക്ഷണം (രാവിലെ ചായ, പ്രഭാതഭക്ഷണം, ഉച്ചഭക്ഷണം, അത്താഴം).
* ടൂര് എസ്കോര്ട്ടിന്റെയും സുരക്ഷാ ജീവനക്കാരുടെയും സേവനം.
* യാത്രാ ഇന്ഷ്വറന്സ്.
നോണ് എ.സി ക്ലാസ്സിലെ യാത്രയ്ക്ക് സ്റ്റാന്ഡേര്ഡ് എന്ന വിഭാഗത്തില് ഒരാള്ക്ക് 24350/- രൂപയും തേര്ഡ് എ.സി ക്ലാസ്സിലെ യാത്രയ്ക്ക് കംഫര്ട്ട് എന്ന വിഭാഗത്തില് ഒരാള്ക്ക് 36340/- രൂപയുമാണ്.
കേന്ദ്ര / സംസ്ഥാന സര്ക്കാര്, പൊതുമേഖലാ സ്ഥാപനങ്ങള് എന്നിവിടങ്ങളില് ജോലി ചെയ്യുന്നവര്ക്ക് LTC സൗകര്യം ലഭ്യമാണ്.
കൂടുതല് വിവരങ്ങള്ക്കും ബുക്കിംഗിനും ഫോണില് ബന്ധപ്പെടുകയോ IRCTC വെബ്സൈറ്റ് സന്ദര്ശിക്കുകയോ ചെയ്യാവുന്നതാണ്.
വെബ്സൈറ്റ് – https://bit.ly/3JowGQa
എറണാകുളം – 8287932082
തിരുവനന്തപുരം : 8287932095
കോഴിക്കോട് : 8287932098
