പൂഞ്ഞാര്: കനത്ത മഴ തുടരുന്നതിനിടെ പൂഞ്ഞാര് തെക്കേക്കരയില് സംരക്ഷണഭിത്തി തകര്ന്ന് വീടിന്റെ ഒരുഭാഗം തകര്ന്ന് മീനച്ചിലാറ്റില് പതിച്ചു. പൂഞ്ഞാര് പെരിങ്ങുളം റോഡില് ബെവ്കോ ഔട്ട്ലെറ്റിന് സമീപം ആറ്റുതീരത്തോട് ചേര്ന്ന് താമസിക്കുന്ന പാറയില് ജോസിന്റെ വീടാണ് തകര്ന്നത്. വീട്ടിലുണ്ടായിരുന്നവര് അത്ഭുതകരമായി രക്ഷപെട്ടു.
ആറോളം പേരാണ് വീട്ടിലുണ്ടായിരുന്നത്. റോഡിന് പിന്നിലായി സംരക്ഷണഭിത്തിയോട് ചേര്ന്നാണ് വീട് നിര്മിച്ചിരിക്കുന്നത്. സംരക്ഷണഭിത്തി ആറ്റിലേയ്ക്ക് പതിച്ചതിനൊപ്പം വീടിന്റെ ഒരുഭാഗവും ആറ്റിലേയ്ക്ക് വീണു. വീട്ടുപകരണങ്ങളും നഷ്ടമായി.
പഞ്ചായത്ത് പ്രസിഡന്റ് ജോര്ജ്ജ് അത്യാലില്, സെക്രട്ടറി സിജി, വില്ലേജ് ഓഫീസര് ഇന് ചാര്ജ്ജ്, വാര്ഡ് മെമ്പര് റോജി തോമസ് തുടങ്ങിയവര് സ്ഥലം സന്ദര്ശിച്ചു. വീട്ടുകാരോട് മാറി താമസിക്കാന് നിര്ദേശം നല്കിയിട്ടുണ്ട്. പഞ്ചായത്ത് പരിധിയില് കനത്ത മഴയാണ് രേഖപ്പെടുത്തിയത്.
