കാസര്കോട്: എഐ ക്യാമറ വന്നതോടെ ആരംഭിച്ച കെഎസ്ഇബി-മോട്ടോര്വാഹന വകുപ്പ് പകപോക്കല് തുടരുന്നു. ബില്ലിടക്കാത്തതിനാല് കാസര്കോട് എന്ഫോഴ്സ്മെന്റ് ആര്ടിഒ ഓഫീസിന്റെ ഫ്യൂസ് കെഎസ്ഇബി കഴിഞ്ഞ ദിവസം ഊരിയിരുന്നു. വിവിധ മാസങ്ങളിലെ ബില് തുകയായി 57,000 രൂപ അടയ്ക്കാനുണ്ടെന്ന് കാട്ടിയാണ് കെഎസ്ഇബി ഫ്യൂസൂരിയത്. ഇതിനു പകരമായി കാസര്കോട് കെ എസ് ഇ ബിയ്ക്ക് വേണ്ടി ഓടുന്ന വാഹനത്തില് കെഎസ്ഇബി എന്ന ബോര്ഡ് വച്ചതിന് 3250 രൂപ പിഴ ചുമത്തി. ആര്.ടി.ഒയുടെ അനുമതിയില്ലാതെയാണ് ബോര്ഡ് സ്ഥാപിച്ചതെന്ന് കാണിച്ചാണ് എംവിഡി പെറ്റി അടിച്ചത്.
അതേസമയം മട്ടന്നൂരില് ഫ്യൂസ് ഊരിമാറ്റിയതോടെ വൈദ്യുതി ചാര്ജ് ചെയ്യാന് കഴിയാതെ വന്നതോടെ ആര്.ടി.ഒയുടെ മൂന്ന് വാഹനങ്ങള്ക്ക് ഓടാന് സാധിച്ചിരുന്നില്ല. ഇവിടെ വൈദ്യുതി തുക 52,820 രൂപ കുടിശിക ഉള്ളതിനാലാണ് വൈദ്യുതി വിഛേദിച്ചത്. ഏപ്രില്, മേയ് മാസങ്ങളിലെ തുകയാണിത്. കണ്ണൂര് ജില്ലയിലെ റോഡ് ക്യാമറകള് നിയന്ത്രിക്കുന്നത് ഈ ഓഫീസില് നിന്നാണ്. ജൂലായ് ഒന്നിന് രാവിലെയാണ് കെ എസ് ഇ ബി ഉദ്യോഗസ്ഥര് ഫ്യൂസ് ഊരിയത്. ബില് അടയ്ക്കാത്ത സംഭവത്തില് മുന്പും ഈ ഓഫീസിലെ ഫ്യൂസ് ഊരിയിട്ടുണ്ട്.
